Cənubi Koreyalı texnologiya nəhəngi Samsung özünün yeni orta seqment smartfonu Galaxy A56 modelini təqdim edib. Belə ki, 45 Vt sürətli şarj dəstəyi təqdim edərək öz sinfində fərq yaradan cihaz, güclü Exynos 1580 prosessoru və Awesome Intelligence adlı süni intellekt xüsusiyyətləri ilə diqqət çəkir. İndi isə keçək smartfonun daxili parametrlərinə detallı nəzər salmağa.
Galaxy A56, süni intellekt xüsusiyyətləri ilə istifadəçi təcrübəsini növbəti səviyyəyə qaldırır. Belə ki, Circle to Search, Best Face, Object Eraser və xüsusi filtr yaratma vasitələri kimi süni intellekt xüsusiyyətləri ilə şəkil çəkdirmə və axtarış təcrübəsini təkmilləşdirən cihaz öz gücünü Exynos 1580 çipsetindən alır. Habelə, smartfon 6.7 düymlük FHD+ təsvir ölçülü Super AMOLED ekran paneli ilə təchiz edilib. Hansı ki, bu ekran 120 Hz yeniləmə tezliyi, 1900 nit maksimum parlaqlıq kimi göstəricilərə sahib olub.
Samsung tərəfindən oktyabr ayında təqdim edilən Exynos 1580 çipsetini istifadə edən ilk smartfon olan Galaxy A56, əvvəlki modelə nisbətən əhəmiyyətli bir performans artımı təmin edir. 2,9 GHz prosessor, AMD əsaslı GPU və 14,7 TOPS NPU ilə təchiz edilmiş cihaz keçən illə müqayisədə 37% daha çox performans təklif edir. Habelə, kamera tərəfində smartfon 50 MP f/1.8 əsas, 12 MP f/2.2 ultra geniş, 5 MP f/2.4 makro kameraları ilə təchiz edilib. Ön tərəfdə isə bizi 12 MP f/2.2 selfie kamerası qarşılayır.
Android 15 əsaslı One UI 7.0 ilə qutusundan çıxan cihaz 45 Vt sürətli şarj dəstəkli 5000 mAs batareya həcminə sahib olub. Qeyd edək ki, sürətli şarj ilə batareyanı 30 dəqiqədə 65% şarj etmək olur. Qeyd edək ki, 45 Vt şarj əvvəllər sadəcə S seriyası üçün əlçatan olurdu. Bu dəfə isə Samsung yenilik edərək orta seqment smartfonlara da 45 Vt gətirib.
Galaxy A56-nın qiyməti bölgəyə görə dəyişir. ABŞ-da 128 GB-lıq model 499 dollar, Avropada 128 GB-lıq model 479 avro, 256 GB-lıq model 529 avro, Böyük Britaniyada 256 GB-lıq model 499 funt-sterlinq səviyyəsində müəyyən edilib.
