Cənubi koreyalı texnologiya nəhəngi bu dəfə orta səviyyəli smartfonunu təqdim etməyə hazırlaşır. Belə ki, Samsung brendinin məşhur orta səviyyəli Galaxy A35 modeli barədə yeni məlumatlar ortaya çıxmağa başlayıb. İnternetə sızdırıla render şəkillərinə əsasən Galaxy A34 modelinin varisi fərqli ekran dizaynına sahib olacaq. Samsung yeni orta səviyyəli smartfon modelində dəlikli ekran dizaynından istifadə etməyə niyyətlidir. Qeyd edək ki, Samsung brendi Galaxy A34 modelində çəntikli ekran dizaynından istifadə edirdi.
Samsung Galaxy A35 artıq daha müasir görünüşə sahib olacaq. Bundan əlavə 2024-cü ildə qarşımıza çıxacaq orta səviyyəli smartfon 161,6 x 77,9 x 8,2 mm ölçülərə də sahib olacaq. Habelə Galaxy A15 və A25 modelləri barədə ortaya çıxan iddialar kimi, bu smartfonda da səs və güc düymələrinin yerləşdiyi hissə daha çıxıntılı olacaq. O cümlədən orta səviyyəli smartfon 6.6 düymlük FULL HD həlli ilə 120 Hz OLED ekran panelinə də sahib olacaq. İddialara görə smartfon sələfi kimi ekranaltı barmaq izi skanerinə də sahib olacaq.
Samsung brendi yeni orta səviyyəli smartfonunda AMD-nin RDNA2 əsaslı GPU-suna sahib Exynos 1480 platformasından istifadə edə bilər. Həmçinin cihaz 8-128GB yaddaş seçimi ilə təklif olunacaq. Kamera tərəfində isə bizi üçlü kamera quruluşu qarşılayacaq. Bunlar müvafiq olaraq 50MP əsas, 8MP ultra geniş bucaqlı və 5MP makro kameraları olacaq. Cihaz Android 14 və One UI 6 ilə birlikdə qutudan çıxacaq. Hələlik isə cihazın nə zaman satışa çıxacağı və təqdim ediləcəyi məlum deyil.
