Texnologiya sahəsinin aparıcı brendlərindən olan Samsung bu dəfə işləri cığırından çıxarır. Belə ki, samsung şirkəti 440MP təsvir ölçülü kamera üzərində çalışır. Ümumiyyətlə bu gün Samsung, Xiaomi və Apple arasında rəqabət mövcuddur. Bu rəqabət əsasən smartfonların performansı üzrə olsa da, kamera göstəriciləri də önəm daşıyır. Daim iPhone modellərindən daha yaxşı kameraya sahib olmağa çalışan hətta bəzi modellərində bunu bacaran Samsung bu dəfə öz məqsədini böyüdür. Daha əvvəl şirkətin 200MP kamera sensoru hazırladığı hərkəsə məlumdur. Bu dəfə isə texnologiya nəhəngi istifadəçiləri üçün 440MP kamera sensoru hazırlamaq istəyir.
Texnologiya sahəsi barədə daim etibarlı xəbərləri ilə tanınan Revegnus mənbəsi bu barədə paylaşım edib. Belə ki, onun paylaşımına görə Samsung 3 ədəd yeni ISOCELL kamera sensoru hazırlayacaq. Hətta bu kamera sensorları gələn ilin 2-ci yarısında bazara çıxacaq. Samsung 50MP, 200MP və 440MP olmaqla 3 yeni kamera sensoru üzərində çalışır. Bunlardan bəzilərinin piksel ölçüsü də artıq məlumdur. 50MP GN6 sensoru 1,6μm piksel ölçüsünə sahib olacaq, 200 MP HP7 sensorunda isə bu göstərici 0,6μm olacaq. Hələlik 440MP HU1 kamera sensorunun hansı piksel ölçüsünə malik olacağı isə məlum deyil.
Qeyd edək ki, yeni hazırlanan kamera sensorları gələn ilin ikinci yarısından sonra istehsal olunacaq. Yəni biz Galaxy S24 seriyasında 440MP kamera sensoruna şahid ola bilməyəcəyik. Yalnız Galaxy S25 seriyasında Samsung yeni flaqman kamerasından istifadə edə bilər. Lakin hələlik bu qədər çox təsvir ölçülü kameranı dəstəkləyəcək mobil çipset mövcud deyil.
