Xiaomi Redmi Note 14 seriyası Çində təqdim edildikdən bir neçə ay sonra nəhayət qlobal bazar üçün də debüt edib. Beləliklə, Yeni seriya istifadəçilərin müxtəlif ehtiyaclarını ödəmək üçün hazırlanmış üç modeldən ibarətdir: Redmi Note 14, Note 14 Pro və Note 14 Pro+. Həm güclü xüsusiyyətləri, həm də rəqabətli qiymətləri ilə seçilən bu modellər smartfon dünyasında olduqca rəğbətlə qarşılanır.
İlk öncə qeyd edək ki, Redmi Note 14 5G, FHD+ həlli və 120 Hz yeniləmə tezliyi ilə 6,67 düymlük OLED displeylə gəlir. Ekranın ən yüksək parlaqlıq səviyyəsi sələfi ilə müqayisədə inkişaf edərək 2100 nita qədər artırılıb. Gorilla Glass 5 ilə qorunan ekranın altına barmaq izi oxuyucusu da əlavə edilib. İkili kamera quruluşuna malik Redmi Note 14 5G-nin əsas kamerası OIS dəstəyi ilə 50MP Sony LYT-600 sensorundan istifadə edir. Maraqlısı budur ki, sələfi Note 13 5G-nin 108 meqapiksellik əsas kamerası ilə müqayisədə daha aşağı təsvir ölçülü sensora üstünlük verilib. Əsas kamera 2MP-lik ikinci sensor ilə dəstəklənir. Ön tərəfdə isə bizi 16MP selfie kamerası qarşılayır. Smartfon öz gücünü Dimensity 7025 Ultra çipsetindən alır.
Note 14 Pro modelində isə bizi 6,67 düymlük əyri AMOLED ekran qarşılayır. MediaTek Dimensity 7300 çipsetindən güc alan bu smartfon 8-dən çox süni intellekt tərəfindən dəstəklənən xüsusiyyətlərlə foto və video redaktə təcrübəsi təqdim edir. 50 meqapiksellik Sony LYT-600 əsas kamerası, 8 meqapiksellik ultra geniş bucaqlı və 2 meqapiksellik makro kamera ilə təchiz edilmiş cihaz keyfiyyətli görüntülər əldə etməyinizə də imkan verir. Ön tərəfdə 20 meqapiksellik selfi kamerasına sahib olan smartfon 45Vt sürətli şarj dəstəkli 5500 mAh batareya həcminə də sahibdir.
Seriyanın top modeli olan Redmi Note 14 Pro+ isə premium xüsusiyyətləri ilə diqqət çəkir. Belə ki, 6,67 düymlük AMOLED ekran və Qualcomm Snapdragon 7s Gen 3 prosessoru ilə təchiz edilən cihaz istifadəçilərinə yüksək performans vəd edir. Smartfon, 50 meqapiksellik Light Hunter 800 əsas kamera, 8 meqapiksellik ultra geniş bucaqlı obyektiv və 50 meqapiksellik telefoto obyektiv kimi güclü kamera xüsusiyyətləri ilə seçilir. 90 Vt sürətli şarj dəstəkli 6200 mAh batareya həcminə sahib olan smartfon IP68 və IP69 sertifikatları sayəsində həm həm suya, həm də yüksək təzyiqli su axınına davamlıdır.
Ümumilikdə Xiaomi-nin Redmi Note 14 seriyası fərqli büdcələrə və istifadəçilərin gözləntilərinə uyğun xüsusiyyətləri ilə bazara iddialı bir giriş edir. Qeyd edək ki, cihazlar 13 dekabrdan satışa çıxarılacaq.
