Xiaomi, ötən ilin yanvarında təqdim edilən Redmi Note 12 seriyasının xələfi üçün anonslar etməyə başlayıb. Belə ki, bir müddətdir Redmi Note 13 seriyası barəsində məlumatlar gəlməyə davam edir. Ötən gün Çin nəhəngi gözlənilməz bir paylaşım ilə Redmi Note 13 Pro+ modelinin bəzi xüsusiyyətlərinə aydınlıq gətirib.
Məlum olduğu kimi, Redmi Note 13 seriyası ən azı üç model ilə qarşımıza çıxır. Seriyanın ən sadə Note 13 modelindən başlayaraq Note 13 Pro və Note 13 Pro+ ilə model xətti ilkin mərhələdə Çin üçün tamamlanır. Xiaomi tərəfindən paylaşılan şəkillər Redmi Note 13 Pro + modelinin Samsung tərəfindən hazırlanmış 200 MP 1/1.4 düymlük ISOCELL HP3 Discovery Edition sensoru ilə təqdim ediləcəyini göstərir. Bu sensor Xiaomi əməkdaşlığında bu model üçün xüsusiləşdirmələrə sahib olması ilə cüzi üstünlüklərə malikdir. Şəkildəki başqa bir detal da Redmi Note 13 Pro modellərinin MediaTek Dimensity 7200-Ultra çipsetinə sahib olmasıdır.
Məlumatlara görə, bu çipset 2.8 GHz tezliyində işləyən 2 ədəd Cortex-A715 nüvəsinə və 6 ədəd 2.0 GHz tezliyində Cortex-A510 nüvəsinə malik konfiqurasiya təklif ediəcək. Oyun və qrafika əsaslanan yükləmələr üçün prosessor Mali-G610 GPU və APU 650 AI çipi ilə gücləndiriləcək. TSMC-nin 4nm istehsal prosesi ilə hazırlanmış bu çipset performans baxımından Snapdragon 778G çipsetinin önündə, təqribi Snapdragon 870 səviyyələrində, lakin enerji sərfiyyatı baxımından xeyli üstün nəticə göstərməlidir.
Çin bazarı üçün bu ay satışa çıxarılması gözlənilən smartfonlar, ilin sonuna doğru qlobal bazar üçün də əlçatan olacaq. Xiaomi son nəsillərdə Redmi modellərini qlobal bazar və Çin üçün çox ayırmadığından eyni smartfonların qlobal bazara gəlməsi gözləniləndir.
