Hindistanda tez-tez partlayan smartfon xəbərlərlərini eşitmək mümkündür. Bunun ən böyük səbəblərindən biri əhalinin çox olması və Çin mənşəli smartfonların Hindistanda aktiv olaraq istifadə edilməsidir. Hətta Çin brendlərinin büdcəvi smartfonları elə həmin ölkədə istehsal edərək geniş kütləyə çatdırması, uyğun olaraq problem yaşanma ehtimalını da müsbət istiqamətdə artırır. Lakin bəlkə də əlavə olaraq smartfonlardan qeyri-düzgün istifadə, bilərək və ya təcrübəsiz bir şəkildə edilən müdaxilələr bu tip problemlərin yaranmasına səbəb olur. Ehtimalları kənara qoysaq, Hindistanlı bir texnobloqer tərəfindən verilən məlumata görə Redmi 6A modelinin partlaması ölümə səbəb olub.
Xiaomi şirkəti Redmi 6A modelinin ölümə səbəb olduğu faktı ilə bağlı araşdırma aparır
Xəbər ötən gün MD Talk YT adlı Hindistanlı texnoloji bloq yazarı tərəfindən paylaşılıb. Texnobloqer qeyd edir ki, ötən gecə xalası yaşadığı evdə ölü tapılıb. Hadisənin partlayan Redmi 6A modelindən qaynaqlandığı deyilir. İddialara görə Redmi 6A modelini yatarkən enerji mənbəyinə taxan qadın telefonu yastığın yanına, üzünə yaxın hissəyə qoyaraq yatıb. Telefon isə bir müddət sonra partlayaraq faciəvi ölümə səbəb olub.
“Aşağıda paylaşılan tvitdə faciəvi hadiəsədən sonra qeydə alınmış şəkillər və.s yerləşdirilib. Lakin həmin görüntülərin çox həssas olduğunu nəzərə alaraq, baxıb-baxmamaqla bağlı seçimi özünüzün etməyinizi məsləhət görürük. “
Xiaomi şirkəti tərəfindən verilən məlumatda isə yaşanmış bu halla bağlı çox ciddi araşdırma aparılacağı deyilir. Problemin həqiqətən partlayan smartfondan qaynaqlandığı təsdiq olunarsa, Xiaomi şirkətinin imici bundan xeyli təsirlənə bilər. Hal-hazırda şirkət zərərçəkən ailə ilə əlaqədədir. Əlavə olaraq ailə üçün yaşanmış vəziyyətlə bağlı hər bir dəstəyin veriləcəyi də Xiaomi tərəfindən qeyd edilir.
