Hal-hazırda çipset və ya prosessor istehsalı üçün ən vacib komponent yarımkeçirici çip təminatıdır. Bu sahədə Samsung və bazarda lider olan TSMC şirkətləri isə sektorun təqribi 80-90% hissəsinə sahibdirlər. Hansı ki, Nvidia, AMD, Intel, Snapdragon, Exynos, Apple A, Apple M seriyası və.s kimi çipset və ya prosessorlar məhz bu 2 şirkətin texnoloji prosesi ilə istehsal olunur. İndi isə İntel şirkəti 100 milyard dollardan çox yatırım planı ilə bu sahədə aslılığı azaltmağa hazırlaşır. Verilən məlumata görə 2025-ci ilə qədər Intel şirkətinin özü də genişmiqyaslı yarımkeçirici çip istehsalına başlayan şirkət kimi tarixə keçəcək.
Intel ümumilikdə 8 istehsal müəssisəsindən ibarət çip istehsal fabriki hazırlayır
İldə ortalama 135.000 dollar maaş alan 3000-dən çox işçiyə sahib olacaq bu müəssisənin təməli ötən günlərdə ABŞ prezidenti Joe Biden və Intel baş icraçı direktoru Pat Gelsinger tərəfindən atılıb. Asiya ölkələrindən olan çip aslılığını zəiflətməyə çalışan Biden hökuməti avqust ayında qəbul edilən CHIPS qanunu üzrə yarımkeçirici çip istehsalı və inkişafı ilə məşğul olacaq ABŞ şirkətləri üçün 52.7 milyard dollar təşviq və vergi endirimləri təklif edir. Intel şirkəti də CHIPS qanununun gətirdiyi üstünlüklərdən yararlanacaq.
Qeyd edilənə görə Intel çip istehsalı üçün 1000 hektar ərazi ayırıb və 7000 işçi ilə 8 istehsal müəssisəi inşa edir. İstehsalın ən gec 2025-ci ilə qədər bitməsi planlaşdırılır. Intel şirkətinin hədəfində kompüter avadanlıqları, mobil cihazlar, avtomobillər üçün yarımkeçirici çip istehsalına sahib olmaqdır. Lakin neçə nm texnoloji prosesə sahib olacaqları, istehsal texnologiyalarının nə dərəcədə effektiv nəticə verəcəyi sual altındadır. Təəssüf ki, istehsal prosesinin detalları hələ açıqlanmayıb. Bu barədə yeni detalların 2024-cü ildə ictimaiyyətə açıqlanacağı gözlənilir.
