Xiaomi-nin münasib qiymətli smartfon brendi Redmi, 10 illik yubileyini qeyd edir. Redmi-nin ilk smartfonu Hongmi olan 31 iyul 2013-cü ildə təqdim olunmuşdu. Bununla bağlı məlumatı Weibo-da paylaşan Xiaomi baş direktoru Vanq Hua 10 il əvvəl keçirilən xüsusi mətbuat konfransını xatırladıb. Maraqlıdır ki, həmin konfrans tamamilə smartfonların əldə nümayiş etdirilməsi və heç bir proyektordan istifadə edilməməsi ilə diqqət çəkibmiş. Həmin tədbir zamanı Redmi 1 kimi də tanınan Redmi Hongmi, Xiaomi qurucusu Lei Jun və bəzi China Mobile rəhbərləri də daxil olmaqla kiçik bir qrup media təmsilçisinə nümayiş etdirilib.
Konfransdan sonra cihaz buraxılarkən rekordlar qırıb. Xiaomi, həmin təqdimatı ilə Çində 1000 yuan (təxminən 140 dollar) altında olan smartfonların satışında inqilab etdi. Redmi brendinin 10 il əvvəlki Hongmi modelinin təsiri yalnız daxili bazarla məhdudlaşmırdı. Cihaz növbəti il qlobal bazarda populyarlıq qazandı.
İlk Redmi smartfonu 4 nüvəli MediaTek MT6589T prosessoruna malik idi və 3G bağlantısını dəstəkləyirdi. Onun 4,7 düymlük ekranı 312 PPI piksel sıxlığı və 720p təsvir ölçüsü təklif edirdi. Bununla belə, cihaz yalnız 1 GB RAM və 4 GB daxili yaddaş malik idi. Kameraya gəlincə, 8MP arxa kamera və ön tərəfdə 1,3MP selfi kamerası quraşdırılmışdı. Telefon 2000 mAs batareya ilə işləyirdi və Android 4.2 əsasında MIUI 5 əməliyyat sistemi ilə qutudan çıxırdı.
Redmi smartfon bazarında, xüsusən Hindistanda çox uğurla inkişaf edir. Keçən il 20% bazar payı ilə Hindistanın 1 nömrəli smartfon markası idi. Redmi smartfonları Çin, İndoneziya və Vyetnam kimi digər ölkələrdə də ən populyarlar arasındadır.
