Zaman keçdikcə, smartfonların təkmilləşdiyi hər kəsə məlumdur. Texnologiya nəhəngləri smartfonların kamera, ekran və çipset performanslarını artırmaq üçün daim yeniliklər edir və dizayn tərəfində bəzi təkmilləşdirmələrə imza atırlar. İndi isə Realme GT Neo 6 SE modelinin sözün əsl mənasına göz qamaşdıran 6000 nit parlaqlığa malik ekrana sahib olacağı açıqlanıb. Qeyd edək ki, bütün diqqətləri öz üzərinə cəlb etməyi bacaran smartfon aprel ayında satışa çıxarılacaq.
Realme və BOE, tezliklə satışa çıxarılacaq GT Neo 6 SE üzərində əhəmiyyətli bir əməkdaşlıq ediblər. Bu gün keçirilən tədbir çərçivəsində telefonda istifadə olunacaq xüsusi ekranın rəsmi təqdimatı olub. Bütün məhdudiyyətləri aşan bu ekran, parlaqlıq tərəfində çox nadir göstəriciyə sahib olacaq. Beləliklə, yeni Realme GT Neo 6 SE təqdim edəcəyi 6000 nit ekran parlaqlığı ilə istifadəçilərin gözlərini qamaşdıracaq. Müqayisə üçün qeyd edək ki, bu ilin əvvəlində təqdim edilən və ekran keyfiyyəti ilə bütün diqqətləri cəlb edən Galaxy S24 Ultra modelinin maksimum ekran parlaqlığı 2600 nitə bərabərdir. Bu ekranda həmçinin gözlərin qorunması və toxunma həssaslığı kimi bəzi təkmilləşdirmələr də var.
6000 nitlik maksimum parlaqlıq həddi Realme GT Neo 6 SE modelində yer alan ekranı dünyanın ən parlaq ekranı etsə də, bu daim saxlanılan səviyyə olmayacaq. Cihaz 1600 nit qlobal maksimum parlaqlıq və 1000 nit əlavə manuel maksimum parlaqlıq təklif edəcək. BOE genişləndirilmiş dinamik diapazonlarla üstün oyun təcrübəsi üçün “game super HDR” xüsusiyyətini önə çıxarır. Habelə, Realme GT Neo 6 SE 3+1 Pulse aşağı tezlikli titrəmə, 2160Hz yüksək tezlikli PWM qaralma və aşağı mavi işıq xüsusiyyətlərini dəstəkləyir. Əlavə xüsusiyyətlərə adaptiv displey, yuxu rejimi və gözün yorğunluğunu azaldan göz qorunması daxildir. 8T LTPO texnologiyasında istifadə edən Realme bildirir ki, ekran yenilənmə tezliyi də 0.5 ilə 120Hz arasında dəyişir.
