Ötən gün Realme şirkəti GT seriyasının növbəti səs gətirən modelini anons etdi. Söhbət istər texniki xüsusiyyətləri, istər dizaynı ilə diqqətləri öz üzərinə toplayan GT Neo 5 modelindən gedir. Smartfonun texniki xüsusiyyətləri barədə daha əvvəl sizlərə məlumat vermişdik. Ona görə də bəziləriniz üçün texniki xüsusiyyətlər əvvəlcədən məlumdur. Lakin Realme GT Neo 5 modeli texniki xüsusiyyətərindən daha çox təklif etdiyi ilklərlə diqqət çəkir. İlklərdən biri smartfonun 240 vatt sürətli şarj ilə təchiz olunmasıdır. Bu ilk bilinən bir detal olduğundan ikinci detal daha maraqlıdır. Belə ki, Realme GT Neo 5 modeli 1TB yaddaşa malik dünyanın ən ucuz smartfonu olaraq tarixə keçir.
Smartfonun dizaynı olduqca sadə görünür. Lakin arxadakı şəffaf kimi görünən kamera modulu adasında, LED bildiriş işığı diqqət çəkir. Gözəl bir dizayn elementi seçən Realme həmin hissədə Snapdragon 8+ Gen 1 imzalı stikerin kənarına LED işıq quraşdırıb. Həmin LED işıq smartfonun vəziyyəti ilə bağlı müxtəlif məlumatlar verə və bildiriş xəbərdarlıqları üçün tənzimlənə bilər.
Realme GT Neo 5 modeli bizlər üçün nə vəd edir?
Texniki cəhətdən ilk növbədə bu cihazın performans və batareya parametrlərinə toxunaraq başlamaq lazımdır. Smartfon öz gücünü Snapdragon 8+ Gen 1 çipsetindən alır. Şirkət smartfonun performansını maksimum səviyyədə tutmaq üçün UFS 3.1 və LPDDR5X yaddaş texnologiyalarından bu modeldə yararlanır. Smartfonun bütün imkanları yaddaş və şarj dəyəri ətrafında formalaşır. Smartfon alıcılara həm 240 vatt, həm 150 vatt olmaqla 2 fərqli variantda təqdim edir. Lakin, əslində daha çox məbləği 240 vatt üçün yox, sanki daha böyük yaddaş həcmi üçün ödəyirsiniz. Qiymətlərə baxdıqda nə demək istədiyimizi görəcəksiniz.
Batareyalar da sürətli şarj dəstəyi baxımından da seriya daxilində cihazlar 2 yerə ayrılır. 240 vatt sürətli şarj dəstəkləyən batareya 4600 mAs olub, 150 vatt üçün bu 5000 mAs təşkil edir. Fantastik də görünsə 240 vatt ilə 20% şaj etməyə 80 saniyə vaxt lazımdır. Tam şarj isə 10 dəqiqənin altındadır. Realme bu modelində SuperVOOC şarj texnologiyasından istifadə edir.
Smartfonun ön tərəfində olduqca yüksək keyfiyyətli ekran paneli işlədilir. 6.74 düymlük ekran 10 bitlik AMOLED panellə təchiz olunub. Görüntü yeniləmə tezliyi 144 Hz olarkən, sensor tezliyi nə az, nə çox tam olaraq 1500 Hz təşkil edir. Təsvir ölçüsü isə 2772×1240 piksel olan ekran 1.5K görüntülər yarada bilir. Yəni bu baxımdan da sinfində ən mükəmməl ekrana malikdir.
İndi isə biraz bu cihazın kameralarından bəhs edək. Arxa tərəfdə bizi 1/1.56 düymlük OIS ilə gücləndirilmiş IMX890 50MP kamera sensoru gözləyir. 6P adlandırılan 6 plastik elementli obyektiv Realme GT Neo 5 modelinin kamerasında işlədilir. Əsas xüsusiyyəti isə bundan ibarətdir. Digər iki kameralar 8MP ultra-geniş bucaqlı və 2MP makro kameralarıdır. Ön tərəfdə isə 16MP selfi kamerasını görmək mümkündür.
Realme GT Neo 5 yüksək keyfiyyət standartlarını özündə birləşdirir. TUV Rheinland davamlılıq sertifikatı almış cihaz xüsusi soyutma texnologiyaları ilə şarj müddəti zamanı 10 dərəcədən çox isinmədiyini təsdiq edir. 1600 dəfə tam dolub boşaldıqdan sonra batareya həcminin 80%-lik hissəsini qorumağı bacarır. Smartfon optimal termal vəziyyətini çoxqatlı qrafit lövhələrinə və 8 elementli soyutma sisteminə borcludur. Smartfon Android 13 üzərində Realme UI 4.0 ilə qutudan çıxır.
Realme GT Neo 5 Qiyməti
- 8-256GB 368$
- 12-256GB 400$
- 16-256GB 427$
- 16GB-1TB 515$ (240 vatt)
- 16GB-256GB 470$ (240 vatt)
