Realme firması bu gün özünün ən güclü smartfonu olan Realme GT 2 Master Explorer Edition modelini təqdim etdi. Belə ki, bu model sadə və tox görünən dizayn, yüksək performans, yetəri qədər güclü kamera performansı istəyənlər üçün əvəzedilməz seçim ola bilər. Ötən ildən fərqli olaraq Realme tərəfindən nisbətən daha ucuz variant kimi Realme GT 2 Master Edition çıxarılmadı. Ola bilsin daha sonra fərqli təqdimat tədbirində həmin model təqdim ediləcək, amma hələlik məlumat yoxdur.
Realme GT 2 Master Explorer Edition bizə nə vəd edir?
İlk olaraq smartfonun dizaynından danışmağa başlayaq. GT 2 Master Explorer Edition üçün şirkət kəskin kənarlı gövdə dizaynı seçib. Lakin ekranın kənar çərçivələri çox nazik olduğundan (üstdə 1.48 mm, aşağıda 2.37 mm) insanda xoş təəssürat yaratmağı bacarır. Smartfonun nəhəng ölçüsünə baxmayaraq 195 qram çəkiyə sahib olduğunu da vurğulamaq lazımdır. Arxa tərəfə baxdıqda isə standart Realme dizaynını görəcəksiniz. Sadəcə “Travel Trunk Edition” xüsusi buraxılışı çantaya bənzər arxa qapaq dizaynına malikdir, lakin texniki cəhətdən sadə variantından fərqlənmir.
GT 2 Master Explorer Edition modelinin performansı
Smartfon öz gücünü Snapdragon 8+ Gen 1 çipsetindən alır. TSMC əsaslı istehsal prosesi ilə bazardakı ən güclü çipseti əldə edən model əlavə olaraq bəzi yeni texnologiyaları da özündə birləşdirir. Söhbət LPDDR5X texnologiyasından gedir. Yeni nəsil operativ yaddaş həlli, LPDDR5 ilə müqayisədə 2.1 GB/San daha sürətlidir, həmçinin 20% daha az enerji sərf edir.
Digər bir yenilik isə Realme X7 çipidir. Realme firmasının təkmilləşdirdiyi görüntü çipi smartfonun performansını və enerji sərfiyyatını optimizasiya edir. 30FPS və ya 60FPS rəqəmsal formada 120FPS kimi göstərə bilir. Cihaza quraşdırılmış 2 kameralı buxar qazanı isə sistemin rahat soyuyaraq performansını qorumasını təmin edir. Yaddaş tipi isə UFS 3.1-dir.
GT 2 Master Explorer Edition modelinin kamerası
Smartfonun arxa tərəfində üçlü kamera modulu yerləşir. Ən üstdə IMX766 50MP əsas sensor mövcuddur. 1/1.56 düymlük bu sensor OIS ilə gücləndirilib. Aşağı hissədə isə bir ədəd 150° ultra-geniş bucaqlı 50MP kamera və bir ədəd 2MP mikroskopik (makro əsaslı) kamera yerləşdirilib. Ön tərəfdə 16MP selfi kamerası mövcuddur. Kamera parametrləri çox zəngin olmasa da gündəlik çəkilişlərinizə yetəri qədər kifayət etməlidir.
Smartfonun ekranı
Keçək biraz da smartfonun ekranı barədə danışmağa. Hansı ki, ekran bu smartfonun ən mükəmməl detallarından biridir. 6.7 düymlük FHD+ AMOLED ekran 120Hz görüntü yeniləmə tezliyinə sahibdir. İsifadəçilərin problem yaşamamasına görə, rənglər JNCD~0.4 dəyərində kalibrasiya edilib. Yəni rənglər həqiqiyə daha yaxın görünür. Ən əlamətdar cəhəti isə şəkildən də gördüyünüz kimi çox nazik ekran çərçivələridir. Selfi kamerası görünüşü korlamasa boydan-boya ekran çox gözəl təcrübə yaşa bilərdi. Lakin bununla da qane olmağa dəyər.
Smartfonun batareyası, qiyməti və yerdə qalan detallar
Realme şirkəti yeni modelini 5000 mAs batareya ilə təchiz edib. 100 Vt dəyərində sürətli şarj adapteri ilə sadəcə 25 dəqiqədə batareyasını 100% doldurmağı bacarır. Kənar çərçivələri tamamilə 5G bağlantısını təkmilləşdirmək üçün antena rolunu oynayır. Eyni zamanda ötən ildən başladılan 360° NFC xüsusiyyəti bu modeldə də qorunaraq saxlanılıb. Realme UI 3.0 əsaslı Android 12 əməliyyat sisteminə sahibdir. Smartfon hələ ki, yalnız Çin üçün nəzərdə tutulub. Qlobal bazar üçün təqdim edilməsi məyus edici olsa da planlaşdırılmır.
Realme GT 2 Master Explorer Edition modelinin qiyməti:
- 8-128GB 3499¥ (520$)
- 8-256GB 3799¥ (565$)
- 12-256GB 3999¥ (595$)
