Beləliklə, OnePlus Nord seriyasının yeni üzvü olan Nord 4 rəsmi olaraq təqdim edilib. Metal çərçivəyə sahib olan cihaz qiymət və performans baxımından ideal smartfon olaraq qiymətləndirilir. İtaliyanın Milan şəhərində baş tutan tədbirdə təqdim edilən yeni Nord 4 modeli sələfi ilə müqayisədə əhəmiyyətli təkmilləşdirmələri ilə diqqət çəkməyi bacarıb.
İlk öncə qeyd edək ki, yeni OnePlus Nord 4 modeli Snapdragon 7+ Gen 3 çipseti ilə təchiz edilib. O cümlədən smartfon metal çərçivəsi və cəmi 0.8 mm olan qalınlığı ilə diqqət cəlb edir. Ümumiyyətlə, Selfie kamerası mərkəzdə yerləşdirilmiş kiçik ekran dəliyində olan Nord 4 dizayn baxımından bəzi insanlara köhnə Google Pixel modellərini xatırladır. 6,5 düymlük 1,5K 120 Hz AMOLED ekrana sahib olan smartfon kamera tərəfində yeniliklər təqdim edir.
Təbii ki, OnePlus Nord 4 flaqman səviyyəli olmasa da, qiymət və performans tərəfində orta səviyyəli smartfon bazarında olduqca dişli rəqib hesab oluna bilər. Bu model həmçinin şəkillərdən obyektlərin silinməsi və səsli mesajların ümumiləşdirilməsi kimi süni intellekt alətlərini də əhatə edir. Kamera tərəfində isə smartfon 16 MP selfi kamerası, 50 MP əsas və 8MP ultra geniş bucaqlı kamera sensorlarına sahib olub. Bundan əlavə, smartfon 5500 mAs batareya həcminə və 100 Vt sürətli şarj dəstəyinə sahibdir. Qiymət tərəfində isə 8-128GB, 12-128GB, 12-256GB və 16-512GB yaddaş versiyalarına sahib olan smartfon müvafiq olaraq, 360 dollar, 395 dollar, 430 dollar və nəhayət 650 dollar qiymət etiketinə sahib olub.
