Beləliklə, Cənubi Koreya dünyada pilotsuz uçuş aparatlarına qarşı lazer silahı istifadə edən ilk ölkə olacağını açıqlayıb. “StarWars” adlı lazer sistemi ölkəni Şimali Koreyanın pilotsuz təyyarə hücumlarından qoruyacaq. Cənubi Koreyanın Müdafiə Proqramı İdarəsi olan DAPA verdiyi açıqlamada dünyada pilotsuz uçuş aparatlarına qarşı lazer silahı istifadə edən ilk ölkə olacaqlarını bildirib.
Hanwha Aerospace tərəfindən hazırlanmış lazer sistemi işə salındıqdan sonra hər atış üçün təxminən 1,45 dollar sərf edəcək. Bu silahların gələcəkdə müharibə strategiyalarını dəyişdirəcək yeni texnologiya olduğunu bildirən DAPA, “Ölkəmiz dünyada lazer silahlarını qoşunlarından istifadəyə verən və işlədən ilk ölkədir” deyə də açıqlama verib. Ümumiyyətlə, DAPA-ya görə, bu lazer sistemi Şimali Koreyanın pilotsuz silahlarına qarşı cavab imkanlarını daha da gücləndirəcək. DAPA sözçüsü bildirib ki, lazer silahları dronların mühərriklərini və ya digər elektrik avadanlıqlarını 10-20 saniyə ərzində işıq şüaları ilə yandıra bilər.
Qeyd edək ki, son dövrlərin inqilabi yeniliyi hesab olunan PUA yəni pilotsuz uçuş aparatları savaşda strategiyaları alt-üst edir. Məhz bunun qarşısını ala bilmək üçün indi ABŞ, İngiltərə, Yaponiya, İsrail, hətta Türkiyə kimi ölkələr lazer silahları hazırlayırlar. Yaxın gələcəkdə isə Cənubi Koreyadan əlavə bir neçə ölkə bu sistemi istifadəyə verəcək. Xatırladaq ki, 2022-ci ilin aprelində İsrail Müdafiə Nazirliyi lazer sisteminin ilk sınaqlarında pilotsuz uçuş aparatlarını, raketləri, minaatanları və tank əleyhinə raketləri uğurla vurduğunu elan etmişdi. Habelə, 2022-ci ilin dekabrında ABŞ-ın müdafiə sənayesi şirkəti Lockheed Martin, Iron Beam-in inkişafına töhfə vermək üçün İsrailin silah istehsalçısı Rafael ilə müqavilə imzalayıb. Cənubi Koreya isə hələ də müharibə vəziyyətində olduğu Şimali Koreyanın PUA-larına qarşı olaraq yeni lazer sistemini artıq istifadəyə verib.
