İsveçin Chalmers Texniki Universitetinin tədqiqatçıları həm struktur komponenti, həm də batareya rolunu oynayan karbon lifli material hazırlayıblar. Beləliklə, yeni batareya elektrikli nəqliyyat sənayesini kökündən dəyişə bilər. İsveçdəki Chalmers Texniki Universitetinin (CTU) törəmə şirkəti olan Sinonus, elektrik enerjisini saxlaya bilən karbon lif materialı ilə nəqliyyat sektorunu dəyişdirməyi hədəfləyir.
Qeyd edək ki, yeni hazırlanan karbon lifli bu material həm struktur elementi olaraq, həm də batareya kimi fəaliyyət göstərə bilir. Bununla da, artıq nəqliyyat vasitələrində ağır batareyalardan istifadə olunmasına ehtiyac qalmayacaq. Ümumiyyətlə, şirkət universitet tədqiqatçılarının karbon lifli kompozit materiallardan real dünyada istifadə etməyin yolunu tapmasından bir il sonra 2022-ci ildə qurulub. Sinonus bildirir ki, hazırda texnologiyasını kommersiyalaşdırmaq ərəfəsindədir. CTU Materiallar və Hesablama Mexanikası Professoru Leif Asp, inkişaf etdirdikləri texnologiyanı belə izah edir: “Struktur batareyaları istehsal etmək üçün əvvəlki cəhdlər yaxşı mexaniki xassələrə və ya yaxşı elektrik xassələrinə malik batareyalar ilə nəticələnmişdi. Lakin karbon lifindən istifadə edərək, həm rəqabət qabiliyyətli enerji saxlama həcminə, həm də xüsusi sərtliyə sahib olan struktur batareya yaratmağı bacardıq”.
Bu texnologiya sayəsində daha uzun mənzilli, daha yüngül, daha səmərəli elektrik avtomobilləri və daha az yanacaq sərfiyyatı olan təyyarələr hazırlamaq mümkün ola bilər. Sinonus CEO-su Markus Zetterström bildirir ki, yeni texnologiyanı müxtəlif sənayedə istifadə etməklə həm çəki, həm də həcm tərəfində fərqlilik yaratmadan enerji saxlama qabiliyyətini artırmaq mümkündür. Materialın enerji sıxlığının hələ inkişaf mərhələsində olduğunu bildirən Zetterström, enerji sıxlığının hal-hazırda adi litium-ion batareyanın 25%-i ilə 50%-i arasında olduğunu da bildirib.
