Bildiyimiz kimi, son illərdə Ay-a olan maraq artıb. Hətta bəzi ölkələr Ay üzərində əldə edilən hər bir yeniliyi yeni bir mübarizə və ya rəqabətə çeviriblər. Bununla belə, Çinli alimlərin fikrincə, Ay tezliklə öz peyk naviqasiya sisteminə yəni GPS infrastrukturuna sahib olacaq. Çin Kosmik Aparat Sistemləri Mühəndisliyi İnstitutundan olan bir komanda, Çinin məqsədlərinə dəstək olmaq üçün real vaxt rejimində Ay ətrafında yüksək dəqiqlikli naviqasiya təmin edəcək 21 peykin inşasını qiymətləndirir.
Bu mövzuda nəşr olunan araşdırmaya görə, peyklər davamlı və sərfəli bir dizaynla üç mərhələdə dörd növ orbitdə yerləşdiriləcək. Məlumatlara görə, peyklərin inşası üçün vaxt qrafiki hələ müəyyən edilməyib, lakin Çin 2030-cu ilə qədər Aya astronavt göndərməyi və 2035-ci ilə qədər beynəlxalq tərəfdaşlarla Ayın cənub qütbündə tədqiqat bazası yaratmağı hədəfləyir. Çinin Chang’e-nin baş konstruktorlarından biri olan Peng Jing-in rəhbərlik etdiyi komandanın fikrincə, Ay səthində eniş, uçuş və kəşfiyyat üçün real vaxt rejimində, yüksək dəqiqlikli naviqasiya və yerləşdirmə sistemi yəni, GPS infrastrukturu böyük fayda verə bilər.
Alimlər təklif etdikləri Ay GPS şəbəkəsini əvvəlcə cənub qütb bölgəsinə, sonra isə bütün Aya genişləndirməyi hədəfləyirlər. Qeyd edək ki, Yer ətrafında dövr edən qlobal naviqasiya peyk sistemləri adətən 20-35 peykdən ibarətdir və bir neçə metr dəqiqlik təklif edir. Çinli tədqiqatçılar, Yerdəki kimi, ən azı dörd peykdən gələn siqnalları qəbul edərək Ayın orbitində oxşar struktur qurmağı və onun yerini müəyyənləşdirməyi planlaşdırırlar. Planlara görə, birinci mərhələdə son dərəcə elliptik, son dərəcə sabit orbitdə yalnız iki peykin yerləşdirilməsi nəzərdə tutulur. İkinci mərhələdə, doqquz peyk və iki orbit növü əlavə etməklə, peyk sistemi Ayın cənub qütb bölgəsi üçün real zamanda naviqasiyanı təmin etmək və Yerlə fasiləsiz əlaqə yaratmaq məqsədi daşıyır.
