OnePlus brendi 3 avqust tarixində Çin bazarı üçün OnePlus Ace Pro, qlobal bazar üçün OnePlus 10T modelini təqdim edəcək. Yəni eyni cihaz iki fərqli bazarda, fərqli adlarla nümayiş etdiriləcək. Təqdimata 2 həftə qalmasına baxmayaraq OnePlus 10T modeli barədə bir çox detallar, modelin görüntüləri məlum olub. OnePlus brendi adına bizi məyus edən ən əsas şey, OnePlus Ace modelindən sonra bu modeldə də sürüşən bildiriş düyməsinin olmamasıdır. Göründüyü qədərilə OnePlus brendi OPPO inteqrasiyasından sonra iPhone modellərindəkinə bənzər bu xüsusiyyəti tamamilə unudub.
OnePlus 10T modelin çox güclü texniki detallar ilə təchiz edilib
Belə ki, smartfon öz gücünü Snapdragon 8+ Gen 1 çipsetindən alacaq. OnePlus modelləri arasında indiyə qədər istifadə edilən ən güclü çipset məhz OnePlus 10T modelində olacaq. 16GB-a qədər geniş operativ yaddaş həlli təklif edən brend cihazı UFS 3.1 və LPDDR 5 texnologiyaları ilə təmin edəcək. Cihaz eyni zamanda çox yaxşı soyutma sisteminə sahib olacaq ki, performansını uzun müddət sabit saxlaya biləcək. OnePlus 10T modeli AnTuTu sintetik testindən 1 141 383 xal toplamağı bacarıb. Bildirilir ki, OnePlus 10T modelində 16GB operativ yaddaş və xüsusi band genişliyi ilə smartfon 35-ə qədər tətbiqi açıq saxlaya biləcək. Eyni zamanda tətbiqlər 16% daha sürətli açılacaq. Növbəti 4-6 il boyunca cihaz arxa plan tətbiqlərini açıq saxlamaqda əziyyət çəkməyəcək. OnePlus 10T modelində performans barədə danışa biləcəyimiz detallar bu qədərdir.
Smartfona FHD+ təsvir ölçülü 6.7 düymlük AMOLED ekran paneli quraşdırılacaq. Selfi kamerası isə artıq son modellərdə sol üstə yox mərkəzə quraşdırılır. Bu model üçün də vəziyyət eynidir. Qeyd edək ki, selfi kamerası 16MP təsvir ölçüsünə malikdir. Arxa tərəfdə biri 50MP əsas, 8MP ultra-geniş bucaqlı, 2MP dərinlik (və ya makro) sensorları mövcuddur. Qeyd etməliyik ki, kamera parametrləri o qədər də güclü deyil.
4800 mAs batareyası isə 150 Vt sürətli doldurma dəstəkləyir. Batareya hər biri 2330 mAs olan 2 hüceyrədən ibarətdir. OnePlus 10T modeli ilə bağlı daha ətraflı detallar növbəti həftə təqdimat tədbirindən sonra məlum olacaq.
