Huawei şirkəti dünyanın ən nazik və ən yüngül 11 düymlük planşeti olan Huawei MatePad Pro 11 modelini təqdim edib. Təqdimat tədbiri çərçivəsində isə HarmonyOS 3 əməliyyat sistemi şirkətin digər məhsulları ilə birlikdə qarşımıza çıxarılıb. Gəlin ilk olaraq canlı görüntülərini də sizinlə bölüşdüyümüz MatePad Pro 11 modelinə nəzər salaq.
Planşet öz erqonomik dizaynına görə fərqlənir. Huawei mühəndisləri 11 düymlük planeşti 5.9 mm-ə qədər nazikləşdirə biliblər. Çəkisi isə sadəcə 449 qram təşkil edir. Arxa tərəfdə künc hissəyə dairə formasında kamera modulu yerləşdirilib. Modul daxilində isə 2 ədəd kamera sensoru mövcuddur. Ön tərəfdən baxdıqda planşet üçün çox da qalın olmayan ekran çərçivələri görülür. Ekranın sol üst hissəsində selfi kamerası üçün deşik mövcuddur. Heyif ki, Huawei mühəndisləri selfi kamerasını çərçivəyə inteqrasiya etməyib.
Planşetin ekranı 2560 x 1600 (WQXGA) təsvir ölçüsünə malikdir. 11 düymlük OLED ekran panelinin görüntü yeniləmə tezliyi 120Hz təşkil edir. Bu ekran paneli TÜV Rheinland tərəfindən Full Care Display 3.0 sertifikatını alıb. Ekranın gövdə nisbəti 92%-dir ki, kənar çərçivələrin nazik olduğu burdan da sübut olunur.
2 fərqli çipsetlə bazara çıxarılan MatePad Pro 11 modeli öz gücünü Snapdragon 888 və Snapdragon 870 çipsetlərindən alır. Texniki cəhətdən 2 variant arasında şarj sürəti xaricində ciddi bir fərq olmasa da, qiymət cəhətdən müəyyən fərqlər var. Huawei planşetlərin performansını sabit saxlamaq üçün buxar kameralı soyutma sistemindən istifadə etməkdən çəkinməyib. Çünki, Huawei PC Application Engine vasitəsilə bəzi kompüter xüsusiyyətlərini planşet üzərindən istifadə etmək mümkün olacaq. Ona görə planşetin performansını stabil saxlaması əhəmiyyətlidir.
Huawei MatePad Pro 11 modeli 8300mAs batareyaya sahibdir. Snapdragon 888 variantı 66 Vt, Snapdragon 870 variantı isə 66 Vt sürətli doldurma dəstəkləyir. Kameralara gəldikdə ön tərəfdə 16MP selfi, arxa tərəfdə 13MP əsas və 8MP ultra-geniş bucaqlı kameralar mövcuddur. Ümumilikdə 6 ədəd səs ucaldana və 4 ədəd mikrofona sahibdir.
Planşet üçün xüsusi hazırlanmış maqnetik klaviatura və örtük Wi-Fi antenasınsa sahibdir ki, planşetin kənarlarını bağlandıqda internet sürətini azaltmaq əvəzinə 20%-ə qədər artırır. Klavitura planşetdən ayrılıb uzaqdan da yazı yazmaqda istifadə oluna bilər. Huawei eyni zamanda 2ms gecikmə müddətində sahib Huawei M-Pencil qələmini də alıcılara təqdim edir.
Qiyməti
- Snapdragon 870 8-128GB 3299¥ (490 $)
- Snapdragon 870 8-256GB 3799¥ (560 $)
- Snapdragon 888 8-128GB 3599¥ (535 $)
- Snapdragon 888 8-256GB 4099¥ (610 $)
- Snapdragon 888 12-512GB 5299¥ (785 $)
- Snapdragon 888 8-256GB LTE 5099¥ (755 $)
- Snapdragon 888 12-256GB LTE 7499¥ (1110 $) Aksessuarlar daxil
Yeni HarmonyOS 3 əməliyyat sistemi nə vəd edir?
HarmonyOS 3 əməliyyat sisteminin əsası sistem performansı, gizlilik və təhlükəsizliyə dayanır. Sentyabr ayından etibarən bir çox cihaz üçün əlçatan olacaq HarmonyOS 3 versiyası elə ciddi dəyişikliklər keçirməyib. Əməliyyat sisteminin dizayn elementlərində və bəzi funksiyalarında təkmilləşdirmələr mövcuddur.
İlk diqqət çəkən nüans Super Frame mühərrikidir. Belə ki, bu mühərrik qrafik çipin enerji sərfiyyatını 11% azaldacaq və tətbiqin performansını 14% yüksəldəcək. Ekranın sürüşdürmə zamanı axıcılığı da 18% artarkən, tətbiqlərin açılma sürəti 7% yüksələcək.
Digər yeniliklər isə ən çox HarmonyOS ekosistemini əlaqələndirir. Məsələn, HarmonyOS dəstəkli cihazlarda telefonunuz ilə səsi televizordan qulaqlığınıza və ya fərqli bir səs ucaldana ötürə bilərsiniz. Əgər avtomobil HarmonyOS dəstəklidirsə, smartondakı funksiyalar və tətbiqləri avtomobilin ekranına yönləndirərək böyük ekranda görə bilərsiniz. Digər bir əsas yenilik isə təhlükəsizliklə bağlıdır ki, tətbiqlərin kameralar, mikrofon, internet icazələri tələb etməsini istifadəçiyə məlumatlandıran təhlükəsizlik mərkəzi yaradılıb. Yerdə qalan xırda dəyişikliklər isə vidjetlərin xüsusiləşdirilməsi ilə və.s bağlıdır.
