Deyəsən, Çinin Tayvanla yaşadığı problemlərin timsalında ötən həftə təqdim edilməli olan 3 yeni Motorola modeli bu həftəyə təxirə salındı. Aydındır ki, söhbət başlıqdan da gördüyünüz Motorola S30, X30 Pro və qarşıdakı saatlarda sizinlə bölüşəcəyimiz Motorola Razr 2022 modelindən gedir. Xiaomi firması da bu gün özünün yeni smartfonlarını və digər məhsullarını təqdim edəcək. Ona görə vaxt itirmədən gəlin dünyanın ilk 200MP kamerasına sahib smartfonuna və ümumilikdə Motorola firmasının 2 yeni flaqman modelinə nəzər salaq.
Moto X30 Pro modeli nə vəd edir?
Dünyanın ilk 200MP kameralı smartfonu olan Motorola X30 Pro modelinin dizaynı və bəzi texniki xüsiyyətləri ən az 7 ay əvvəldən ortaya çıxmışdı. Əgər texnologiya sahəsini yaxından izləyirsinizsə 7 ay əvvəl məlum olan smartfonun Motorola Frontier olaraq adlandırıldığını xatırlayacaqsınız. Həmin prototip artıq Motorola X30 Pro olaraq qarşımızdadır.
Smartfonun dizaynı standart premium flaqmanlardan fərqlənmir. Hətta kamera modulunun dizaynı Xiaomi modellərini müəyyən qədər xatırladır. Kvadrat şəkilli kamera modulu sol üstə yerləşdirilib və ümumilikdə obyektiv ilə birlikdə üst-üstə 3 fərqli çıxıntı mövcuddur. Smartfonun bütöv qalınlığı 8.39 mm təşkil edir. Lakin kənarlar qıvrımlı olduğu üçün əldə çox qalın hissiyat yaratmamalıdır.
Başlayaq elə smartfonun kamera parametrlərindən. Samsung şirkətinin ötən il təqdim etdiyi 1/1.22 düymlük 200MP ISOCELL HP1 sensoru nəhayət Motorola X30 Pro ilə istifadəyə verilir. 200MP əsas kamera OIS stabilizatoru ilə gücləndirilib. İkini sensor isə 12MP IMX663 olub, 2 qat optik yaxınlaşdırma edə bilən telefoto kamerası xüsusiyyətini yerinə yetirir. Telefoto kamerasında da OIS mövcuddur. Arxa tərəfdəki sonuncu 50MP sensor isə, 117˚ ultra-geniş bucaqlı kamera funksiyasını yerinə yetirir. Yaxın məsafədən makro kamera kimi də işlədə bilərsiniz. Ön tərəfdə isə tam olaraq 60MP təsvir ölçülü OV60A sensoru quraşdırılıb.
Smartfon öz gücünü Snapdragon 8+ Gen 1 çipsetindən alır. LPDDR 5 və UFS 3.1 yaddaş çipləri ilə təchiz edilən Motorola X30 Pro modelinədə, performansı yaxşılaşdırmaq və 4610 mAs batareyanı 125 Vt ilə isinmədən doldurmaq üçün “təkmilləşdirilmiş” soyutma sistemi işlədilib. Təbii ki, doğruluğuna inanmaq sizə qalıb. Çünki, soyutma sisteminin 19.371 mm² səth sahəsi olduğu deyilir və bu ölçü o qədər də böyük deyil.
Motorola X30 Pro yanlardan 53˚ qıvrılan 144Hz tezlikli və FHD+ təsvir ölçülü 6.7 düymlük OLED ekran paneli alıb. Yüksək səviyyəli keyfiyyət standartlarına (P3 rəng qamutu, 10 bit rəng və.s) və SGS göz qorunması sertifikatına və DC Dimming (gözə zərəri azaldan titrəmə) xüsusiyyətlərinə malikdir. Yanlardan qıvrımlı ekranın çərçivələri ideal qalınlıqdadır. Bəlkə çənə qismi biraz daha nazik ola bilərdi, amma çox əhəmiyyətli detal deyil.
Qeyd edək ki, smartfon 50 Vt kabelsiz və 10 Vt tərs şarj dəstəkləyir. 125W GaN adapter qutuya daxil edilib. Smartfon bu adapter ilə 7 dəqiqəyə 50%, 19 dəqiqəyə 100% şarj olur. Smartfon Dolby Atmos dəstəkli “Stereo” səs ucaldanlara sahibdir. Android 12 üzərinə MyUI 4.0 ilə təchiz edilib. İndi isə, biraz da Moto S30 Pro modeli barədə danışaq.
Moto S30 Pro modeli nə vəd edir?
Motorola S30 Pro, Moto X30 Pro modelindən nisbətən ucuz modeldir. Dizayn cəhətdən oxşar olsalar da ortaq komponentlərə sahib deyillər.
İlk növbədə ekranı daha kiçik, 6.55 düymlük 144Hz tezlikli OLED panellə əvəz edilib. FHD+ təsvir ölçülü bu ekran panelində də bütün keyfiyyət standartları və gözə zərərin az olduğunu təsdiq edən sertifikatlar mövcuddur. Bu smartfonun da ekranı kənarlardan qıvrımlara sahibdir. Uzun sözün qısası, Motorola X30 Pro ilə eyni xüsusiyyətlərə malik nisbətən kompakt fərqli bir ekran paneli bu cihaza quraşdırılıb.
Motorola X30 Pro modeli ötən il çıxmış Snapdragon 888+ çipsetinə və sürət aşırdılmış UFS 3.1, LPDDR 5 çiplərinə sahibdir. 4400 mAs batareyası 68 Vt şarj dəstəkləyir. Naqilsiz və tərs şarj xüsusiyyətləri yoxdur.
Smartfona OIS dəstəkli 50MP F/1.8 əsas, 13MP F/2.2 123˚ ultra-geniş bucaqlı və təsvir ölçüsü qeyd edilməyən dərinlik sensoru quraşdırılıb. Selfi kamerası isə 32MP təsvir ölçüsünə malikdir. Smartfonun çox “budandığına” baxmayın, qiyməti də itirdikləri səbəb ilə xeyli münasib alınıb.
Belə ki, smartfonların qiymətinə nəzər saldıqda:
Motorola S30 Pro
- 8-128GB 2199 Yuan (326$ / ilkin sifarişlə 296$)
- 12-256GB 2699 Yuan (400$)
- 12-512GB 2899 Yuan (430$)
Motorola X30 Pro
- 8-128GB 3499 Yuan (519$)
- 12-256GB 3999 Yuan (593$)
- 12-512GB 4299Yuan (637$)
