Motorola RAZR (2022) modeli bu gün rəsmi olaraq tanıdılıb. Lenovo şirkətinin Motorola brendinin yeni modeli öz sələfindən dizayn və texniki göstəricilər baxımından xeyli fərqlənir. Cihaz bu dəfə flaqman səviyyəsi prosessor almaqla qalmayıb, kameraları ciddi şəkildə təkmilləşdirib və çıxıntısız tam ekran əldə edib. Qiyməti isə rəqiblərindən daha aşağıdır.
Ötən gün Samsung şirkətinin təqdim etdiyi Galaxy Z Flip 4 qatlanan modeli həm qiymət cəhətdən, həm də bəzi texniki xüsusiyyətləri baxımından RAZR 2022 modelindən geridə qalıb. Deyə bilərik ki, illər əvvəlin məşhur Razr modelinin ən layiqli davamçısı hesab edilə bilər.
Smartfonun texniki göstəriciləri
Moto RAZR modeli qatlana bilən 144 Hz tezlikli ekrana malik ilk smartfon hesab edilir. Cihaz 6,7 düymlük POLED ekran əldə edib. FHD+ təsvir ölçülü ekranı HDR10+, P3 rəng qamutu dəstəyi alıb. Ekran ultra nazik qoruyucu şüşə ilə təchiz olunub. Lenovo şirkəti bu modeldə ekran çərtiyindən və sələfində olan alt kəsikdən imtina edib. Kənar çərçivələr isə cüzi qalın olsa da simmetrik olaraq hazırlanıb.
Arxa tərəfdə isə 2,7 düym nəhəng POLED (800×573 təsvir ölçülü) ekran paneli quraşdırılıb. Bu ekranı normal işlər üçün istifadə edə bilərsiniz. Yəni normal ekranda olan bütün tətbiqlərin balaca ekranda da istifadəsi mümkündür. Z Flip 4 modeli ilə müqayisədə 144Hz tezlikli ekran panelindən sonra ikinci üstünlüyü bu ola bilər.
Yeni Motorola RAZR (2022) modelində iki kamera mövcuddur. Əsas kamera modulu 50MP F/1.8 sensorundan ibarət olub OIS ilə dəstəklənir. İkinci sensor isə 13MP təsvir ölçülü 121° ultra-genişbucaqlı kamera funksiyasını yerinə yetirir. Xaricdəki nəhəng ekranın hesabına hər iki sensor rahatlıqla selfi çəkilişlər üçün istifadə oluna bilər. Lakin əlavə olaraq isə 32MP selfi kamerası smartfonun qatlanan ekranı üzərində mövcuddur.
Cihazın əsasında Snapdragon 8+ Gen 1 çipseti dayanır. LPDDR5 operativ yaddaş və UFS 3.1 yaddaş çipləri ilə təchiz edilib. Batareya həcmi 3500 mAs təşkil edir və 33 Vt ilə şarj olmağı bacarır.
Cihazda Dolby Atmos səs texnologiyasını dəstəkləyən stereo səs ucaldanlar quraşdırılıb. Moto Razr 2022 Android 12 əməliyyat sistemi üzərinə xüsusi hazırlanmış MYUI 4.0 interfeysi istifadə edəcək. Həmçinin xüsusi “Desktop” rejimi də dəstəklənəcək. Hansı ki, xarici ekran qoşulduqda istifadə oluna bilər.
Müqayisə üçün qeyd edək ki, Samsung Galaxy Z Flip 4 modelinin qiyməti 1100 dollardan başlayır. Çində isə yeni Motorola RAZR (2022) modeli artıq 3 versiyada satışa çıxmağa hazırdır.
Motorola Razr (2022) modelinin qiyməti
- 8-128 GB (890$)
- 8-256 GB (964$)
- 12-512 GB (1083$)
