Avqust ayının sonuna qədər, qarşıdakı 3 həftə ərzində müxtəlif markaların qatlana bilən smartfon bazarına “hücum etməsi” ilə yadda qalacaq. Belə ki, yeni Galaxy Z seriyası modelləri 10 avqustda təqdim ediləcək. Seriya daxili Galaxy Z Fold 4 və Galaxy Z Flip 4 modelləri barədə məlumatlar və bəzi görüntülər artıq ortaya çıxıb. Həmin məlumatları sizinlə bir qədər sonra bölüşməyə çalışacağıq. Bundan əlavə Motorola şirkəti də 11 avuqstda, Vivo isə bu ayın sonlarına doğru yeni qatlanan smartfonunu təqdm etməlidir. Lakin bu mövzumuzda yaxınlaşmaqda olan Mix Fold 2 modeli ilə bağlı bəzi detallar ilə tanış olacağıq.
Mix Fold 2 ilə əlaqədar detallar modelin nazik uzun dizaynla gələcəyinə işarə edir
Ötən gün İceUniverse ləqəbli insayder Xiaomi Mix Fold 2 modeli üçün hazırlanan render görüntülərini sosial şəbəkə hesabından paylaşdı. Gördüyünüz dizaynın nə qədər doğru olacağı məlum deyil. Lakin Xiaomi Mix Fold 2 modelinə aid detallar cihazın qapalı vəziyyətdə nazik və uzun quruluşa malik olduğunu göstərir. Bunu bir növ köhnə Galaxy Z Fold seriyasının sevilməyən dizaynına bənzədə bilərsiniz. Yeni Galaxy Z Fold 4 modelində isə gövdə nisbəti yaxşılaşdırıldığı üçün bu problem nisbətən öz həllini tapacaq.
Bazarda Vivo X Fold, Honor Magic Fold kimi cihazlar xaricdəki “qapaq ekranın” ölçülərini normal smartfonlarla eyniləşdirib. Ona görə də cihazı xarici ekranda işlətsəniz belə sıxıcı təcrübə yaşamırsınız. Lakin Mix Fold və indiyə qədər çıxarılmış Z Fold seriyasının timasalında xarici ekranın çox dar olduğunu qeyd etmək mümkündür. Yəni ekran nazik və uzundur.
Mix Fold 2 modelinin xarici ekranı Mix Fold ilə müqayisədə xeyli böyüsə də alt və üst hissələrdə yenə qalın çərçivələrin mövcudluğu müşahidə edilir. Açdıqda 8 düym, qapalı vəziyyətdə 6.5 düym olan smartfonun hər iki ekran paneli 120Hz görüntü yeniləmə tezliyinə sahib olacaq. Xiaomi firması Mix Fold 2 modelinin ekranındakı qırışıqları azaltmaq üçün qatlama mexanizmini də yeniləyəcək. 22061218C model nömrəli Mix Fold 2 ilə bağlı qeyd edilən bu detallar doğrudursa, ölçüləri Galaxy Z Fold 4 modelindən daha böyük olacaq. Galaxy Z Fold 4 modelində 7.6 düym daxili, 6.2 düym xarici ekran işlədilib.
Smartfon öz gücünü Snapdragon 8+ Gen 1 çipsetindən alacaq. 50MP əsaslı kamera konfiqurasiyası LEICA əməkdaşlığında hazırlanacaq. Ehtimallara görə yeni Xiaomi qatlana bilən modeli elə Samsung Galaxy Z seriyasından 1 gün sonra anons ediləcək. Şirkət anonsu 1 gün sonraya salacağı təqdirdə ola bilsin daha çox diqqət çəkəcəyini düşünür. Mix Fold 2 seriyası ilə bağlı əlavə detallar qarşıdakı günlərdə məlum olacaq.
