Xiaomi brendinin orta seqmentə məxsus cihazlar üzrə fokuslanmış altbrendi olan Redmi bu dəfə fərqlilik edib. Belə ki, çin mərkəzli Redmi brendi bu dəfə ilk metal çərçivəli ağıllı saatı Redmi Watch 4 modelini təqdim edib. Qeyd edək ki, yeni ağıllı saat ötən gücə Redmi K70 seriyası, Redmi Buds 5 Pro və yeni Redmi Book modelləri ilə birlikdə bizlərə təqdim edilib. Tədbirin ən çox diqqət çəkən məhsullarından biri də məhz yeni ağıllı saat olub. Bunun əsas səbəbi isə brendin ilk dəfə olaraq metal çərçivəli ağıllı saat təqdim etməsi olub.
İlk öncə onu qeyd edək ki, Redmi Watch 4 saatı sələfi ilə müqayisədə daha böyük ekrana və daha uzun batareya ömrünə sahib olub. Həmçinin bu ağıllı saat 1.97 düymlük, 390 × 450 təsvir ölçülü AMOLED LTPS ekrana malikdir. Bu ekran isə 60 Hz yenilənmət tezliyi və 600 nit ekran parlaqlığına malikdir. O cümlədən yeni saatda istifadəçinin öz üslubuna və Always On Display dəstəyinə görə seçə biləcəyi 200 fərqli saat üzü var.
Yeni ağıllı saat metal, dəri və parça materiallarında müxtəlif kəmər versiyalarına sahib olub. Qan oksigen səviyyəsinin ölçülməsi, yuxu keyfiyyətinin və müddətinin monitorinqi, ürək döyüntüsünün hesablanması kimi standart sağlamlıq funksiyaları da ağıllı saata əlavə edilib. Funksiyalar demişkən, ağıllı saat nə az, nə çox 150 idman rejiminə malikdir. Habelə GPS, NFC modulu kimi xüsusiyyətlər də cihaza əlavə edilib. Batareya tərəfində isə 20 günə qədər istifadə müddəti təklif edən 470 mAs batareya həcmi mövcuddur. Xiaomi Watch S3 kimi Redmi Watch 4 də Çin brendinin yeni HyperOS interfeysində işləyir. Çində yeni ağıllı saat 70 dollar qiymət etiketinə sahibdir.
