Apple yeni Apple Watch Series 10-da istifadə edilən, daha yüksək parlaqlıq və daha az enerji sərfiyyatı ilə tanınan LTPO3 OLED panellərindən istifadəni genişləndirəcək. Belə ki, Apple yeni flaqman iPhone modellərində bu daha parlaq və aşağı enerji sərfiyyatlı OLED ekranlara keçməyi düşünür.
Hazırda, iPhone 16 Pro modelləri bazarda mövcud olan ən yaxşı OLED ekranlardan birinə sahib olsa da, Apple bununla kifayətlənmir. ABŞ mərkəzli texnologiya nəhəngi daha parlaq və daha az enerji sərfiyyatına malik yeni OLED panelləri gələcək iPhone modellərinə inteqrasiya etməyi planlaşdırır. Cənubi Koreyanın “The Elec” nəşrinin məlumatına görə, şirkət gələcək iPhone modellərində “Apple Watch” ilə eyni panel texnologiyasından istifadə etməyi planlaşdırır. Keçən ay təqdim edilən Apple Watch Series 10-da istifadə edilən bu OLED panel LTPO3 adlanır. Bu yeni panel 9-cu seriyada istifadə edilən LTPO2 panelindən 40% daha yüksək parlaqlıq təklif edə bilər. Bununla belə, yeni panel daha az enerji sərf edir. Beləliklə, bu ekranın iPhone modellərində istifadə olunması batareya ömrünə də əhəmiyyətli dərəcədə təsir edəcək.
Bundan əlavə, LTPO3 texnologiyası ilə iPhone-lar həmişə ekran rejimində olduqda daha yüksək yeniləmə sürətinə sahib olacaq və dəqiqədə bir dəfə əvəzinə saniyədə bir dəfə yeniləmə edəcək. Qeyd edək ki, LTPO aşağı temperaturlu Polikristal Silikon TFT-yə oksidlər əlavə edən, daha aşağı yeniləmə sürətlərində enerji istehlakını azaldan və son illərdə qabaqcıl modellərdə tez-tez istifadə olunan bir OLED displey növüdür. Apple-ın iPhone üçün LTPO3 displeylərini nə vaxt buraxacağı məlum deyil. Bununla belə, proqnozlar Apple’ın LTPO2 panellərini iPhone 17 seriyası boyunca birləşdirəcəyini işarə edir. Beləliklə, sadə iPhone modelləri də yüksək yeniləmə sürətinə və həmişə açıq ekran xüsusiyyətinə sahib olacaq.
