Beləliklə, Səudiyyə Ərəbistanında dünyanın ən böyük binası olan “Mukaab”-ın tikintisinə başlanılıb. Paytaxt Ər-Riyadda tikilən bina hündürlüyü və eni 400 metr olan kub şəklində olacaq. Görünən odur ki, ərəblər, daha bir rekorda və ilkə imza atmaq niyyətindədirlər.
Son illərdə həyata keçirdiyi meqa layihələri ilə gündəmdə olan Səudiyyə Ərəbistanı, dünyanın ən böyük binası olan Mukaabın tikintisinə başlayıb. Maraqlısı budur ki, Nəhəng binanın içərisinə 20 Empire State Building sığdıra biləcəyi bildirilir. Daha bir böyük spiral formalı qüllə Mukaabın mərkəzində yerləşəcək və onun xarici görünüşü ənənəvi İslam memarlığından ilhamlanacaq. Bildirilir ki, 2 milyon kvadrat kilometr sahəyə malik binanın qazıntı işləri demək olar ki, yekunlaşıb və indiyədək 10 milyon kubmetr torpaq köçürülüb. Ümumilikdə tikinti prosesində gündəlik 250-ə yaxın ekskavator və 400-dən çox texnika istifadə olunur.
Tikinti işini asanlaşdırmaq üçün, King Khalid yolundan keçməklə tikinti sahəsini birləşdirən müvəqqəti körpünün də tikiləcəyi bildirilir. Şirkət iddia edir ki, iş inanılmaz sürətlə davam edir və tikintidə hazırda gündəlik 900 işçi çalışır. 2030-cu ilə qədər tamamlanması planlaşdırılan layihədə təxminən 100.000 yaşayış yeri, 980.000 kvadratmetr mağaza, 1,4 milyon kvadratmetr ofis sahəsi, otellər, mədəniyyət obyektləri, universitet, teatr və simvolik bir muzey olması gözlənilir.
