iPhone 17 Plus modelinin yerinə təqdim edilməsi gözlənilən yeni iPhone 17 Air modelinin əldə edə biləcəyi dizaynı internetdə paylaşılıb. Belə ki, bir müddətdir gündəmdən düşməyən bu model Apple tərəfindən köklü dizayn dəyişiklikləri ilə təqdim edilə bilər.
Bildiyimiz kimi, iPhone 16 və 16 Pro modelinin təqdim edilməsindən cəmi bir neçə ay keçib. Lakin, biz artıq iPhone 17 xüsusiyyətlərinin necə olacağı ilə bağlı iddiaları görməyə başlamışıq. Bunlardan ən əhəmiyyətlisi isə yeni seriyada iPhone 17 Plus modelinin yerinə təqdim ediləcək iPhone 17 Air modelinin dizaynıdır. Yeni bir mənbəyə görə, iPhone 17 Air mərkəzdə yerləşən kamera dizaynı ilə təqdim ediləcək. Buna görə küncdəki klassik arxa kamera tənzimləməsi artıq istifadə edilməyəcək. Hətta, əvvəlki SE modellərindən fərqli olaraq Air versiyasında ikili kamera quruluşu bizi qarşılaya bilər.
Maraqlısı budur ki, bir çox dizayn yenilənməsi əldə etməsi gözlənilən bu cihazın qiymətinin 1299-1499 dollar aralığında olacağı gözlənilir. Bir sözlə desək, iPhone 17 Air versiyası digər modellərdən fərqlənəcək. Həmçinin ən “incə” iPhone olması gözlənilən bu modelin yüksək sıxlıqlı batareya sayəsində qalınlığı və çəkisi hər kəsi heyran edə bilər. Bununla belə, Apple-ın bu texnologiyanı tətbiq edərkən maneələrlə qarşılaşdığı və dizayn məqsədlərindən geri çəkildiyi bildirilir. iPhone 17 Air ilə yanaşı, iPhone 17 Pro modellərinin də əhəmiyyətli dəyişikliklər və ya təkmilləşdirmələr gətirəcəyi deyilir.
