Cənubi Kaliforniya Universitetində təhsil alan bir qrup mühəndis tələbə tərəfindən hazırlanan Aftershock II adlı raket həm çatdığı hündürlük, həm də sürəti ilə 20 illik rekordu qırıb.
Mövzu Kosmik gəmilər və raketlərə gəldikdə daha çox SpaceX və ya Blue Origin kimi nəhəng şirkətlərdən danışsaq da, raketlərin yaradılması və buraxılması üçün səylər daha kiçik, daha həvəskar miqyasda da davam edir. Xüsusilə texniki universitetlərin tələbələri bəzən bu mövzuda diqqətəlayiq işlər görürlər. Bunun ən parlaq nümunəsi isə ötən günlərdə yaşanıb. Belə ki, Cənubi Kaliforniya Universitetində (USC) təhsil alan bir qrup mühəndis tələbə tərəfindən hazırlanan Aftershock II adlı raket həvəskar raketçilik sahəsində 20 illik rekordu qırmağı bacarıb. Maraqlısı budur ki, raket həm də bu sahədə ən yüksək sürət rekordunun yeni sahibi olub.
Cənubi Kaliforniya Universitetinin nəzdində fəaliyyət göstərən Rocket Propulsion Lab-da hazırlanmış tələbə istehsalı olan bu raket Yer səthindən 143,3 kilometr yüksəkliyə qalxaraq 2004-cü ildən bəri qırılmayan rekordu qırıb. 2004-cü ildə Mülki Kosmos Tədqiqat Qrupunun GoFast raketi 116 kilometr hündürlüyə çataraq, o vaxtlar qırılması çətin görünən rekordu qırmışdı. “Aftershock II” adlanan bu həvəskar raket həm də öz sahəsində ən sürətli raket olub. Belə ki, raket maksimal sürətə çatdıqda sürəti 5796 km/saata çatıb. Rocket Propulsion Lab-ın illərlə davam edən raket proqramından istifadə edən tələbələr, özlərindən əvvəl gələn komandaların işini nümunə olaraq götürüblər. Onlar bu rekordu qırmaq üçün Aftershock II raketində daha təkmil alovlanma sistemi, daha təkmil termal qoruma və bənzər təkmilləşdirmələrdən istifadə ediblər.
