Apple şirkətinin yeni flaqman seriyası iPhone 16 barədə yeni detallar və iddialar ortaya çıxmaqda davam edir. Bir çox insan bu il təqdim edilən iPhone 15 seriyasında edilməyən yeniliklərin gələcək smartfon seriyasında əlavə ediləcəyini düşünürdü. Lakin son günlərdə ortaya çıxan iddialar bu fikiri də təkzib edir. Belə ki, daha əvvəl iPhone 16 və iPhone 16 Plus modellərinin ekran tezliyinin 60Hz olacağını və dəyişiklik edilməyəcəyini xəbər vermişdik. İndi isə iPhone 16 seriyasında batareya tərəfində də çox dəyişiklik edilməyəcəyi ortaya çıxıb.
Təbii ki, hər il olduğu kimi analitiklər Apple brendinin gələcək smartfon seriyası barədə iddialar irəli sürür. İndi isə bu iddialar batareya tərəfindədir. Belə ki, iPhone 16 Pro modelinə aid olduğu iddia edilən parçada batareya həcmi sadəcə 3355 mAh olaraq qeyd olunub. Xatırladaq ki, iPhone 15 Pro modelində 27 Vt sürətli şarj dəstəkləyən 3274 mAh batareyadan istifadə olunmuşdu. Yəni ortaya çıxan məlumat əgər doğrudursa Apple batareya tərəfində sadəcə 2.48% təkmilləşdirmə edəcək. Ümumiyyətlə son dövrlərdə Apple şirkəti cihazlarında çox təkmilləşdirmə etmədiyi üçün analitiklər də bu fikrin doğru olduğuna əmindir.
Qeyd edək ki, hər il Apple yeni flaqman çipsetini təqdim edir. Məhz bu çipsetlərin ən vacib xüsusiyyəti isə enerji səmərəliliyi tərəfində olur. Yəni Apple batareya həcminin Samsung və ya Xiaomi brendləri kimi 5000, 6000 mAh etməsə də, çipsetlərindəki enerji səmərəliliyini çox düzgün konfiqurasiya edir. Məhz yeni iPhone 16 seriyasında da bu ənənənin davam edəcəyi gözlənilir.
