Məşhur Apple analitiki kimi tanınan Ming-Chi Kuo bir daha iPhone 15 Pro ilə bağlı diqqətçəkən iddianı gündəmə gətirib. Oktyabr ayında verdiyi açıqlamaları təkrarlayan Kuo, iPhone 15 Pro və iPhone 15 Pro Max-da fiziki düymələrin olmayacağını irəli sürdü. Son açıqlamaya görə, Apple yeni dizaynın həyata keçirilməsi üçün Cirrus Logic adlı şirkətlə razılığa gəlib. Ming-Chi Kuonun iddiasına görə, iPhone 15 Pro modellərində bir dənə də fiziki düymə olmayacaq. Yəni telefonun sol tərəfindəki səsi azaltma düyməsi və telefonun sağ tərəfindəki ekranı oyandırma düyməsi tarixə qovuşacaq. Yaxşı, əgər düymə yoxdursa, istifadəçilər bu əməliyyatları necə edəcəklər?
Bildiyiniz kimi Apple iPhone 5 və iPhone 6 seriyalarında fiziki ev düyməsini istifadə etdi. iPhone 7 seriyasında isə bu vəziyyət dəyişdi və “solid-state-button” adlı yeni sistem təqdim edildi. Bu yeni sistem telefonlardakı fiziki düyməni aradan qaldırdı. Əvəzində düyməyə bənzəyən şüşə və altına yerləşdirilmiş “Taptic Engine” adlı vibrasiya mühərriklərinə üstünlük verildi. Belə ki, istifadəçi düyməyə bənzəyən hissəyə toxunduqda vibrasiya ilə toxunuş hissiyatı yaşayır. Apple analitiki bu sistemin iPhone 15 Pro və iPhone 15 Pro Max modellərinə daxil ediləcəyini və modellərdə artıq fiziki düymə olmayacağını iddia edir. Beləliklə, fiziki düymə olmayacaq, lakin düymə kimi görünən bir toxunma paneli ilə qarşılaşacağıq.
Ming-Chi Kuonun keçmiş iddialarının reallaşma faizini nəzərə alsaq iPhone 15 Pro modellərinin düyməsiz olma ehtimalının yüksək olduğunu deyə bilərik. Kuonun sözlərinə görə, fiziki düymələri olmayan iPhone istehlakçılar tərəfindən qəbul edilərsə, yeni dizayn növbəti iPhone modelləri və iPad kimi müxtəlif məhsullarda da istifadə olunacaq. Bu arada deyək ki, eyni analitikin iPhone 15 ailəsi ilə bağlı başqa bir iddiası USB Type-C-dir. Bu təəccüblü olmayacaq, çünki Avropa Birliyi Apple şirkətinin USB Type-C-yə keçməsi barədə qərar qəbul edib. Kuonun sözlərinə görə, USB Type-C ilə fiziki düyməsiz dizayn iPhone 15 modelindəki ən böyük yenilik olacaq.
