Bir çox şirkətin maliyyə böhranı ilə qarşılaşdığı dövrdə Intel şirkəti də mini NUC kompüterlərinin istehsalını dayandıracağını açıqlayıb. Belə ki, Next Unit of Computing və ya NUC kompüterləri artıq istehsal olunmayacaq. Bunun əvəzində isə Intel öz biznes yanaşmasını yenidən nəzərdən keçirəcək və kompüter bazarını inkişaf etdirəcək. Beləliklə Intel NUC kompüterlərinə investisiyasını dayandırır.
Maraqlısı budur ki, Intel NUC kompüterlərinin istehsalını dayandırsa da, hazırda bazarda mövcud olan modellərə dəstəyini dayandırmayacaq. Ümumiyyətlə Intel şirkətinin NUC kompüterləri Apple şirkətinin mini modelləri ilə rəqabət aparır. Qeyd edək ki, bu kompüterlər çox kiçik ölçüsü və performansı ilə fərqlənir. Kiçik sistem daxilində güclü prosessora sahib olan bu kompüterlər möhtəşəm oyun təcrübəsi də təklif edir. Həmçinin bu kompüterlər bəzi qrafik kartları da dəstəkləyir. İT istifadəçiləri üçün Intel vPro platformasını da bu kompüterlərdə birləşdirir. Hətta şirkət NUC kompüterləri ilə əsasən İT mütəxəssislərini hədəfləyir.
Xatırladaq ki, 2013-cü ildə Intel ən son texnologiyaları dəstəkləyən prosessorlara sahib olan kompakt NUC masaüstü kompüterləri təqdim etmişdi. Məhz 10 il sonra isə texnologiya nəhəngi bu kompüterlərin istehsalını dayandırır. Şirkətin bu kompüterlərin istehsalını niyə görə dayandırdığı hələlik tam məlum olmasa da bəzi iddialar mövcuddur. Belə ki, əsas iddia və ya səbəblərdən biri məhz bu kompüterlərə olan tələbatın azalmasıdır.
