Texnologiya sahəsində tələb artdıqca, texnologiya nəhəngləri daha performanslı kompüterlərə və daha çox sayda prosessorlara ehtiyac duyur. Məhz bu səbəbdən də Intel şirkəti uzunmüddətdir ki, yeni Aurora süperkompüterini hazırlayırdı. İndi isə şirkət yeni süperkompüterin quraşdırılmasını da başa çatdırıb. Qeyd edək ki, Intel şirkəti Hewlett Packard Enterprise əməkdlığı ilə hazırladığı süperkompüterin dünyanın ən güclüsü olduğunu iddia edirdi. Ümumiyyətlə bu süperkomputer fəaliyyət başladıqda artıq ABŞ-ın ikinci süperkompüteri olacaq. Həmçinin Aurora-nın ABŞ-ın ilk süperkompüteri olan Frontier-i performans cəhətdən qabaqlayacağı gözlənilir.
Qeyd edək ki, Intel şirkətinin Aurora süperkompüteri 63744 ədəd Intel Data Center prosessorlarına və 21248 ədəd Intel Xeon prosessorlarına sahib olacaq. Beləliklə, yeni süperkompüter süni intellekt və mühəndislik tərəfində yüksək performansa sahib olacaq. Ümumiyyətlə Intel yeni süperkompüterdən məlumat analitikası və süni intelelkt sahəsində istifadə etməyi nəzərdə tutur. 220 TB yaddaşa malik olan bu superkompüter bu ilin sonunda fəaliyyətə başlayacaq. 2 exaflop emal gücünə sahib olması gözlənilən kompüter rəqibindən iki dəfə güclü olacaq. Müqayisə üçün qeyd edək ki, hal-hazırda fəaliyyət göstərən Frontier süperkomputeri 1.194 exaflop emal gücünə sahibdir.
Müasir dövrdə iqlim dəyişikliyindən tutmuş bir çox ölümcül xəstəliyə qədər hələ də həlli tapılmayan problemlər mövcuddur. Yeni superkompüter bu cür problemlərin həllində də alimlərə və ya tədqiqatçılara kömək ola bilər. Qeyd edək ki, yeni superkompüter digər rəqiblərindən fərqli olaraq optimallaşdırılıb. Bu səbəbdən də daha sürətli həllər tapa bilir.
