Huawei şirkətinin P50 Pocket modeli bənzəri, lakin bir o qədər də uğurlu olmayan “orta seqment” Pocket S modeli ötən gün təqdim edildi. Uğurlu olmayan kimi qeyd etməyimizin səbəbi isə, orta seqment prosessora sahib bu cihazın qiymətinin xeyli yüksək olmasındadır. Belə ki, qiymət barədə sonda danışacağımızdan ilk olaraq gəlin modelə nəzər yetirək. P50 Pocket modelindəki kimi qadın auditoriyaya yönələrək təqdim edilən bu model də insanlara, smartfonun sanki zinət əşyasına bənzəməsi hissiyatı verilməyə çalışıb. Deyə bilərik ki, P50 Pocket ilə müqayisədə Huawei Pocket S modeli çox da dəyişməyib. Çipset və kamera xaricində eyni xüsusiyyətlərə, o cümlədən dizayna malikdirlər.
Yeni Huawei Pocket S modeli nə vəd edir?
Smartfonun arxa sol üst hissəsində P50 Pocket ilə eyni dizaynda olan kamera modulu və alt hissəsində kiçik bir ekran yer alır. 1.04 düym ölçülü OLED bildiriş ekranı vasitəsilə, müxtəlif işlərin yerinə yetirilməsi mümkündür. Yəni ekran funksionaldır. Ekrandan danışmışkən gəlin elə qatlanan ekran barədə də detalları bölüşək. Qeyd etməliyik ki, Huawei Pocket S modeli, 6.9 düymlük OLED ekran panelinə malikdir. 120Hz tezlikli ekran FHD+ təsvir ölçüsünə sahibdir. P3 rəng qamutu və yüksək tezlikli PWM (titrəməni minimuma endirir) texnalogiyası kimi xüsusiyyətləri özündə birləşdirir. Şirkət qatlama mexanizminin 400.000 dəfəyə qədər davamlı olduğunu bildirir.
kamera konfiqurasiyası cəhətdən F/1.8 40MP əsas, F/2.2 13MP ultra-geniş bucaqlı və bir ədəd avtofokus sensoruna sahibdir. P50 Pocket modelindəki F/1.8 32MP superspektrum sensoru mövcud deyil. Əsas kamerada OIS stabilizatorunun olub-olmadığına dair məlumat yoxdur, lakin böyük bir ehtimalla mövcud olmadığından məlumat verilmir.
Cihaz öz gücünü Snapdragon 778G çipsetindən alır. Bu çipsetin işlədilməsi smartfonu avtomatik olaraq orta və ya ən azından orta-üst seqmentə yönləndirir. 4000 mAs tutumlu batareyası 40 Vatt sürətli doldurma dəstəkləyir. HarmonyOS 3.0 ilə qutudan çıxarılacaq smartfonun 128GB variantı üçün başlanğıc qiyməti 820$ təşkil edəcək. Nəticə etibarilə bu qiymət qarşılığında Snapdragon 778G çipsetli cihazın nə qədər uğurlu olacağı sual altındadır.
