Galaxy S23 seriyasına aid cihazlar son günlərdə müxtəlif sintetik testlərdə qarşımıza çıxır. Galaxy S23 və Galaxy S23+ modellərinə aid Geekbench sintetik testlərinə aid nəticələr tez-tez verilənlər bazasına düşməkdədir. Sintetik testlərdə görülən cihazların hər biri yalnız və yalnız Qualcomm əsaslı platforma üzərinə qurulublar. Yəni daha aydın desək, bu cihazlar öz gücünü Snapdragon 8 Gen 2 çipsetindən alırlar. Sintetik test nəticələri çipsetin performansı ilə bağlı real rəqəmləri çox da göstərmir. Çünki, rəsmi olaraq təqdim edilməyən bu cihazlarda çipsetin performansı biraz düşürülür. Lakin Snapdragon 8 Gen 2 çipsetinin 1 ədəd 3.36GHz tezlikli Cortex-X3 nüvəsinə, 2 ədəd 2.8GHz tezlikli Cortex-A715 nüvəsinə, 2 ədəd 2.8GHz tezlikli Cortex-A710 nüvəsinə və son olaraq 3 ədəd 2.02GHz tezlikli Cortex-A510 nüvəsinə sahib olduğunu söyləyə bilərik. Qəribə olan şey isə indiyə qədər sınaq müddətində qətiyyən Exynos 2300 çipsetli cihaza rast gəlinməməsidir. Normalda hər zaman Exynos çipsetli cihazlar daha əvvəl test edilərkən, bu il Exynos 2300 çipseti barədə heç bir məlumat və sızıntı mövcud deyil.
Verilən məlumata görə Exynos 2300 çipsetinin görülməməsinə səbəb çipsetin inkişafının dayandırılması ola bilər!
Məşhur insayder IceUniverse bu gün öz tviter hesabından detalları bölüşülməsə də maraqlı bir ismarıc verib. Belə ki, tvitdə “Exynos 2300 çipseti barədə hələlik heç bir detallı xüsusiyyət görməmişik. Bunun mənası . . .” deyə qısa bir cümlə qeyd edilib. Samsung şirkətinə yaxınlığı ilə tanınmış insayderin bu tvitindən və verilənlər bazasından alınan məlumatları bir yerə topladıqda çipsetin təxirə salındığını düşünə bilərik.
Əlavə olaraq fərqli mənbələrin verdiyi məlumatda da bu il Exynos 2300 çipsetinin olmayacağını güman etdiklərini bildirirlər. Samsung şirkəti daxilində mobil cihazları istehsal edən bölümün Samsung Exynos istehsalı çipsetlərdən bu il imtina etmək istədiyi bildirilsə də, qeyri-rəsmi məlumatlara görə Samsung Electronics ilə tam razılıq hələ də əldə olunmayıb.
Lakin indiyə qədər Exynos 2300 çipsetinin ortaya çıxmaması bununla bağlı razılıq əldə oluna biləcəyini qismən təsdiqləyir. Əgər qarşıdakı 1 ay ərzində də çipsetlə bağlı heç bir detal gəlməsə, bütün dünyada Galaxy S23 seriyasının Snapdragon 8 Gen 2 ilə satışa çıxarılacağı qismən təsdiqlənmiş olacaq. Ən pis halda Exynos 2300 çipseti təqdimata qədər ortaya çıxarsa, bu çipsetlə smartfonu alacaq ölkələrdə modellərin satışa çıxarılması gecikə bilər.
