Huawei, təşkil etdiyi tədbirdə ən güclü Mate seriyalı smartfonlar olaraq satışa çıxarılan Mate 70 seriyasını təqdim edib. Yeni seriya Huawei Mate 70, Mate 70 Pro, Mate 70 Pro Plus və Mate 70 RS modellərindən ibarətdir. Şirkət performansı vurğulasa da, Mate 70 seriyasının hansı prosessordan istifadə etdiyi sirr olaraq saxlanılır. Qeyd edək ki, ABŞ-ın tətbiq etdiyi sanksiyalardan sonra çip təchizatında yaşanan çətinliklərə baxmayaraq, şirkət Çində bazar payını artırmaq üçün iddialı addımlar atır.
Huawei Mate 70 seriyasının prosessoru haqqında məlumat verməkdən yayınsa da, cihazların əməliyyat sistemi və süni intellekt xüsusiyyətlərini önə çəkib. Belə ki, HarmonyOS Next əvvəlki Mate 60 seriyasından 40 faiz daha yüksək performans vəd edir. Android-dən tamamilə imtina edən bu əməliyyat sistemi Huawei-nin öz ekosistemini qurmaq səyinin yekun məhsuludur. Yeni seriyada istifadəçi təcrübəsini yaxşılaşdıran bir çox süni intellekt xüsusiyyətləri diqqəti cəlb edir. Məsələn, cihazlar arasında məzmun mübadiləsini asanlaşdıran fotoşəkillərin redaktəsi və əl jestləri kimi innovativ xüsusiyyətlər təqdim edilib. HarmonyOS Next vurğulansa da, hər iki smartfon Huawei-nin HarmonyOS 4.3 ilə birlikdə təklif olunur. Belə ki, smartfonlar HarmonyOS Next yenilənməsini daha sonra əldə edəcək.
Mate 70 Seriyası hansı xüsusiyyətlərə sahibdir?
Seriyanın ən kiçik və düz çərçivələrə sahib modeli olan Mate 70, eyni zamanda 7,8 mm ilə seriyanın ən nazik smartfonudur. Mate 70, FHD+ təsvir ölçüsü və 1-120Hz dəyişən yeniləmə tezliyi ilə 6,7 düymlük LTPO OLED ekrana malikdir. Mate 70 Pro isə sadəcə ekran ölçüsünü 6.9 düymə qədər artırır. Hər iki smartfonda 2500 nit pik parlaqlığa malik ikinci nəsil Kunlun Glass və daha çox düşmədən qorunmaq üçün bazalt lif temperli şüşə yer alır. Habelə, smartfonlar IP69 sertifikatına sahibdirlər.
Mate 70 modelinin ön tərəfində 13 MP geniş bucaqlı kamera olduğu halda, Pro modelində əlavə olaraq 3D dərinlik kamerası var. Maraqlısı budur ki, barmaq izi hər iki smartfonda güc düyməsinə inteqrasiya edilib. Bu düymə həm də süni intellekt köməkçisi və ya cihazı iki dəfə və uzun basmaqla səsi söndürmək kimi ağıllı idarəetmələri birləşdirir. Kamera tərəfində Huawei OIS dəstəkli 50MP əsas kamera üçün dəyişən f/1.4-f/4.0 diyafram təklif edir. Həmçinin hər iki smartfon 40MP ultra geniş kamera ilə təchiz edilib. Smartfonlar arasında fərq optik zoom kameraları arasındadır. Hansı ki, Mate 70 5,5x optik zoom-a malik 12MP periskop kamerasına malik olduğu halda, Pro modelində 4x optik zoom-a malik 48MP sensor ilə təchiz edilib.
Huawei-nin istehlakçı biznes qrupunun rəhbəri Richard Yu Chengdong, yeni seriyanı “tarixdəki ən güclü Mate telefonları” adlandırsa da, onları gücləndirən prosessor haqqında heç bir məlumat verməyib. Xatırladaq ki, Huawei əvvəlki Pura 70 seriyasına Kirin 9010 çipini daxil etmişdi. Hazırkı iddialar da, Mate 70 seriyasının Kirin 9100 çipinə sahib olduğunu işarə edir. Prosessor haqqında çox məlumat yoxdur, ancaq SMIC N+3 prosesində istehsal edilən 6nm çip olduğu bildirilir. Huawei Mate 70 66 Vt simli və 50 Vt simsiz şarj dəstəkli 5,300 mAh batareyaya malik olsa da, Mate 70 Pro daha sürətli 100 Vt simli və 80 Vt simsiz şarj dəstəkli 5,500 mAh batareya ilə təchiz edilib.
Qiymət tərəfində isə vəziyyət aşağıdadı kimidir:
Huawei Mate 70 qiyməti
- Mate 70 12GB/256GB: 757 dollar
- Mate 70 12GB/512GB: 826 dollar
- Mate 70 12GB/1TB: 964 dollar
Huawei Mate 70 Pro qiyməti
- Mate 70 Pro 12GB/256GB: 895 dollar
- Mate 70 Pro 12GB/512GB: 964 dollar
- Mate 70 Pro 12GB/1TB: 1,102 dollar
Bundan əlavə seriyanın digər nümayəndələri arasında müvafiq olaraq Mate 70 Pro+ və Mate 70 RS mövcuddur. Huawei Mate 70 Pro+ nəhəng 6,9 düymlük 120 Hz ekranla təchiz edilib. Ən yüksək parlaqlığı 2500 nit olan bu ekranda 13 MP təsvir ölçülü selfi kamerası və 3D üz skan edən sensor var. Smartfonun barmaq izi oxuyucusu sensoru digər modellərdəki kimi yan paneldə quraşdırılıb. Qeyd edək ki, Mate 70 RS modelindəki 6,9 düymlük ekran 3500 nit parlaqlığa malikdir. RS versiyasının selfi kamerası Pro+ ilə eynidir.
Huawei-nin yeni flaqman telefonları Kirin 9100 prosessoru ilə təchiz edilib. 16 GB RAM və 1 TB-a qədər yaddaşla dəstəklənən smartfonlar 100 Vt simli sürətli şarj dəstəyi ilə 5700 mAh batareya ilə təchiz olunub. HarmonyOS 4.3 əməliyyat sistemi ilə işləyən smartfonlar peyk bağlantısı dəstəyinə də sahibdir. Huawei tərəfindən edilən açıqlamaya görə, Mate 70 Pro+ və Mate 70 RS modellərində ortaq kamera quruluşu olacaq. belə ki, smartfonlar OIS dəstəkli 50MP əsas kamera üçün dəyişən f/1.4-f/4.0 diyafram təklif edir, 40MP (f/2.2) ultra geniş bucaqlı kamera və 48MP (f/2.1) telefoto kamera sensorları ilə təchiz edilir.
Qiymətlər aşağıdakı kimidir:
Huawei Mate 70 Pro+
- 16 GB + 512 GB – 1170 dollar
- 16 GB + 1 TB – 1.310 dollar
Huawei Mate 70 RS
- 16 GB + 512 GB – 1.655 dollar
- 16 GB + 1 TB – 1.790 dollar
