HONOR brendi, sabah start götürəcək MWC 2024 tədbirindən əvvəl süni intellekt strategiyasına uyğun olaraq yeni cihazlarını təqdim edib. Belə ki, texnologiya nəhəngi yeni Magic 6 Pro və MagicBook Pro 16 modellərini qlobal olaraq texnologiya həvəskarlarına İspaniyanın döyünən ürəyi olan Barselona şəhərində təqdim edib. Ümumiyyətlə Honor yeni cihazları ilə süni intellekt tərəfinə nə qədər maraq göstərdiyini də bir daha sübut edir.
Qlobal texnologiya brendi olan Honor bu gün süni intellekt dəstəkli əməliyyat sistemi və məqsədə əsaslanan istifadəçi interfeysi təklif edən yeni ağıllı cihazlarını təqdim edib. HONOR MWC 2024 çərçivəsində sadəcə qlobal HONOR Magic6 Pro modelini deyil, həm də süni intellektlə gücləndirilmiş ən yeni MagicBook Pro 16 modelini də bizlərə təqdim edib. HONOR CEO-su George Zhao bildirir ki, “Süni intellekt dövrünə doğru irəlilədikcə HONOR, istehlakçılarımızın arzularını və narahat olduğu mövzuları ələ almaq üçün qüsursuz təcrübə təqdim edən yeniliklər təqdim etməyə sadiq olmağa çalışır”. Həmçinin Zhao əlavə edib ki, “İnsan-cihaz qarşılıqlı əlaqəsində sərhədləri aşarkən, sənayedə aparıcı süni intellekt imkanları ilə istifadəçi təcrübəsində inqilab edən HONOR, yeni ağıllı smartfonlarını və süni intellekt kompüterini qlobal istifadəyə verməkdən məmnunluq hissi duyur”.
HONOR Magic6 Pro ilə süni intellektin sehrini kəşf edin
Honor brendinin flaqman Magic seriyasının ən son nümayəndəsi olan Honor Magic6 Pro modeli həm kamera, həm ekran, həm prosessor, həm də süni intellekt tərəfində istifadəçilərə olduqca yeni imkanlar təklif edir. Məhz sadalanan sahələrdə sələfindən əhəmiyyətli dərəcədə fərqlənən cihaz artıq qlobal miqyasda da diqqətləri öz üzərinə cəlb edib. Belə ki, MWC 2024 tədbirinin ən çox diqqət çəkən cihazlarından birinə çevriləcək Magic6 Pro həm də MagicOS 8.0 ilə təchiz edilib. Qeyd edək ki, HONOR brendi yeni MagicOS 8.0 əməliyyat sistemi ilə süni intellektin sehrlərini istifadəçilərinə ən yaxşı şəkildə təklif edir. O cümlədən, Magic Capsule və Magic Portal ilə zənginləşdirilmiş HONOR Magic6 Pro modeli də istifadəçilərə daha fərdiləşdirilmiş, intuitiv təcrübə təklif edir.
Magic Capsule ilə istifadəçilər sadəcə ekranın yuxarı hissəsinə toxunmaqla vacib resurslardan anında istifadə etmək imkanı əldə edir. Həmçinin Magic Capsule ilə artıq smartfonunuzda çoxsaylı proqramlar arasında keçid etməyinizə də ehtiyac qalmayacaq. Süni intellekt ilə çalışan Magic Portal isə mətn mesajında ünvanları anında tanıya bilir və istifadəçiləri Google Maps-ə yönəldərək onlara zəhmətsiz təcrübə təklif edir. Bundan əlavə Magic Portal, alış-veriş təcrübəsini də olduqca sadələşdirərək istifadəçiləri istədikləri məhsulu tapmaqda və satın almaqda çətinlik çəkməyəcəkləri platforma yönləndirir. Ən maraqlısı isə budur ki, Magic Portal dünyada ən çox istifadə edilən 100-dən çox tətbiqi dəstəkləyir.
HONOR süni intellektin dayanmadan inkişaf etdiyi bu dövrdə sadəcə Magic Capseule və Magic Portal ilə yetinməyib. Belə ki, texnologiya nəhəngi Qualcomm ilə əməkdaşlıq edərək LlaMA 2 dil modelinin internetə çıxış olmadan bir çox funksiyanın yerinə yetirməsinə nail olub. Beləliklə, süni intellekt Magic6 Pro sayəsində olduğunuz yerdən və şəraitdən asılı olmadan hər an sizin yanınızda olacaq və suallarınızı cavablayacaq.
HONOR Magic6 Pro hansı xüsusiyyətlərə sahibdir?
İndi isə əsas məsələyə, yəni MWC 2024 tədbirində və qlobal bazarda bütün diqqətləri öz üzərinə cəlb etməyi bacaran Magic6 Pro modelinin xüsusiyyətlərinə keçək. Biz yuxarıda Magic6 Pro ilə qarşımıza çıxan süni intellekt yeniliklərindən bəhs etdik və indi sıra texniki məsələlərdədir. İlk öncə Magic6 Pro modelinin olduqca iddialı kamera performansı ilə başlayaaq. Süni intellekt ilə dəstəklənən Falcon Kamera sisteminə sahib smartfon əsasən peşəkar səviyyədə idman çəkilişləri ilə məşğul olanlar üçün möhtəşəm seçim olacaq. Çünki, HONOR yeni smartfonda olan təkmilləşdirilmiş çəkiliş sürətləri və daha təkmilləşdirilmiş diyaframlar ilə qızıl medala layiq idman fotoşəkilləri təqdim etməyi prioritet hesab edir.
Sələfindən 28 dəfə böyük verilənlər bazasına əsaslanan süni intellekt modelinə sahib olan yeni Magic6 Pro modeli HONOR AI Motion Sensing Capture funksiyası ilə qarşımızdadır. Texnologiya nəhənginin kamera tərəfində bu qədər iddialı olmasının da əsas səbəbi məhz bu funksiyadır. Yeni funksiya ilə artıq aktiv idman fəaliyyətlərində belə qüsursuz və olduqca aydın şəkillər çəkmək mümkün olacaq. Qeyd edək ki, smartfon 100x rəqəmsal və 2.5x optik yaxınlaştırma ilə 180MP f/2.6 OIS dəstəkli telefoto kameraya, OIS dəstəkli 50MP f/2.0 Ultra geniş kameraya və f/1.4, f/2.0 kimi dəyişkən diyaframlara sahib 50MP əsas kameraya sahibdir.
HONOR brendi bu dəfə də, dayanıqlılıq mövzusuna xüsusi olaraq diqqət ayırıb. Belə ki, yeni Magic6 Pro modeli düşməyə qarşı ən dayanıqlı ekran şüşəsinə malikdir və SGS-nin beş ulduzlu Ümumi Şüşə Düşmə Müqaviməti sertifikatına sahibdir. Ümumiyyətlə “Giant Rhino Glass” 50% daha təkmilləşmiş kristal sıxlığında adi şüşə ilə müqayisədə 10 dəfə daha çox dayanıqlılıq təklif edir. Ekran demişkən, yeni smartfon 6.8 düymlük 120Hz yeniləmə tezliyinə, 4320 Hz PWM qaralma tezliyinə və standart olaraq 1800 nit parlaqlığa sahib ekran panelinə sahibdir. 1264×2800 təsvir ölçülü əyri LTPO AMOLED ekran panelinin parlaqlığı HDR məzmunlarda 5000 nit-ə qədər çata bilir.
Qeyd edək ki, yeni Magic6 Pro modeli Snapdragon 8 Gen 3 çipsetindən güc alır. Belə ki, çipset Snapdragon 8 Gen 3 Mobil Platforması ilə 30% daha çox CPU, 25% daha GPU performansı təklif edir. Həmçinin HONOR Magic6 Pro-da süni intellekt xüsusiyyətləri sələfi ilə müqayisədə 98% daha çox təkmilləşib. Batareya tərəfində isə yeni flaqman smartfon 5600 mAs batareya həcminə sahib olub. Batareyanın ən çox diqqət çəkən xüsusiyyəti isə əla aşağı temperatur performansı təklif etməsidir. Ümumiyyətlə, smartfonlar əksər hallarda soyuq hava şəraitində batareya tərəfində problemlər yaşasa da, HONOR Magic6 Pro ilə 10% batareya qaldıqda belə, -20°C-də YouTube videosunu 81 dəqiqə izləmək mümkündür. 80Vt sürətli şarj dəstəkləyən cihaz 66Vt simsiz şarj imkanı da təklif edir. Məhz bu sayədə smartfonu 40 dəqiqə ərzində 100% şarj etmək mümkündür.
Magic6 Pro modeli qabaqcıl batareya texnologiyası ilə yanaşı 157 xal ilə DXOMARK qlobal displey reytinqində birinci yerdə qərarlaşıb. Bundan əlavə, beş DXOMARK etiketi ilə təltif edilən HONOR Magic6 Pro kamera, səs, ekran, batareya və selfie tərəfində də yüksək performans təklif edir. Parlaq, müasir üsluba üstünlük verən istifadəçilər üçün nəzərdə tutulmuş HONOR Magic6 Pro 1299 avrodan başlayan qiymətlər ilə Qara, Epi Yaşıl, Göl Mavisi, Bulud Bənövşəyisi və Ağ rənglərdə satışa çıxacaq.
Yeni MagicBook Pro 16 və Pad 9
HONOR MWC 2024 tədbiri çərçivəsində yalnız Magic6 Pro ilə deyil, həm də MagicBook Pro 16 və Pad 9 modelləri ilə də texnologiya həvəskarlarını təəccübləndirib. Yeni MagicBook Pro 16 əsasən süni intellekt tərəfində təkmilləşdirilib. O cümlədən yeni noutbuk əməliyyat sistemləri arasında qarşılıqlı əlaqə imkanlarını genişləndirməyi də mümkün edir. Honor süni intellektin təmin etdiyi performans təkmilləşdirmələrindən istifadə edərək, yeni MagicBook Pro 16 modeli, MagicRing ilə HONOR smartfonları, kompüterləri və tabletləri arasında bildirişləri paylaşmağı və materialları sinxronlaşdırmağı ən üst səviyyədə asanlaşdırır. Yəni, artıq MagicBook Pro 16 ilə bütün HONOR cihazları arasında əlaqə olduqca sadədir. O cümlədən yeni MagicBook Pro 16 indi 5600 mAs batareya ilə qarşımızdadır.
Barselona şəhərində keçirilən MWC 2024 tədbiri çərçivəsində HONOR həmçinin yeni Pad 9 modelini də təqdim edib. Yeni planşet 12.1 düymlük 2.5K təsvir ölçülü və 120Hz yenilənmə tezliyinə malik HONOR FullView displeyi ilə təchiz edilib. Bundan əlavə, yeni Pad 9 HONOR Histen səs tənzimləmə texnologiyasına malik səkkiz dinamikli səs sisteminə malikdir. Ümumiyyətlə, yeni planşet qeyri-adi istifadəçi təcrübəsi və fərqli dizaynı ilə bütün diqqətləri öz üzərinə cəlb etməyi bacarıb. Qeyd edək ki, HONOR MagicBook 16 Pro Ağ və Qara rənglərdə təklif ediləcək. O cümlədən 2 fərqli rəng çeşidinə Boz və Mavi sahib olan Pad 9 isə 350 və ya 400 avro qiymət etiketi ilə satışa çıxacaq.
PORSCHE DESIGN HONOR Magic6 RSR qarşımızdadır
Tədbirin ən maraqlı yeniliklərindən biri də PORSCHE DESIGN HONOR Magic6 RSR modelidir. Magic seriyasının özünəməxsus istifadəçi təcrübəsi ilə Porsche Design toxunuşlarının bir araya gəlməsi olduqca möhtəşəm bir smartfonun ortaya çıxmasına səbəb olub. Ümumiyyətlə, Honor bu ilki tədbirdə PORSCHE DESIGN HONOR Magic V2 RSR qatlanan smartfonunu ilk dəfə qlobal səhnəyə çıxarmaqla yanaşı həm də, PORSCHE DESIGN HONOR Magic6 RSR ilə də bizləri təəccübləndirib. Qeyd etmişdik ki, yeni smartfon əsasən idman yarışlarında çəkilişlərin daha aydın və daha mükəmməl olmasına imkan yaradacaq. Məhz yeni PORSCHE DESIGN HONOR Magic6 RSR modeli də Porsche yarış avtomobilinin estetikasına istinad edərək, yüksək performanslı kamerası ilə cəsarətli bir dizayn ortaya qoyur.
