Yəqin ki, smartfon əldə edərkən hər kəs ilk iş olaraq etibarlı ekran qoruyucusu axtarışına çıxır. Bəzən isə insanlar müxtəlif çeşidlərə sahib olan ekran qoruyucuları arasında hansının daha etibarlı olduğunu anlamaqda çətinlik çəkir. Lakin Redmi xəbərdarlıq edir ki, “Maye ekran qoruyucuları istifadə etməyin və onlardan uzaq durun”. Xiaomi alt markası olan Redmi, elektron ticarət saytlarında yeni nəsil ekran qoruyucuları kimi satılan Liquid UV yəni maye ekran qoruyucularının etibarlı olmadığını bildirir.
Ümumiyyətlə, maye ekran qoruyucuları xüsusilə qıvrımlı ekrana malik smartfonlar üçün məşhur seçim olsa da, Redmi bu ekran qoruyucularının yaratdığı risklərə diqqət çəkir. Redmi iddia edir ki, bu ekran qoruyucularında istifadə edilən maye yapışdırıcı düymələr, şarj portları, dinamik dəlikləri və digər smartfon hissələrinə sızaraq cihazların istifadəsinə xələl gətirir. Belə ki, bu maye yapışdırıcılar yekunda smartfonların gözlənilmədən sönməsinə, yenidən başlamasına, düymələrdə nasazlığın yaranmasına hətta korpusun zədələnməsinə səbəb olur.
Əlavə olaraq Redmi bildirir ki, bu tip ekran qoruyucularından istifadə cihazın zəmanətini ləğv edə bilər. Başqa sözlə, ekran qoruyucunun smartfona tətbiq edilməsi zamanı baş verə biləcək hər hansı bir zədə zəmanət çərçivəsindən kənara çıxır. Təcrübəli istifadəçilər maye ekran qoruyucularını uğurla smartfonlarına tətbiq edə bilsə də, hər hansı bir anlıq səhv smartfonu riskə ata bilər. Qeyd edək ki, Redmi temperli və tempersiz şüşə kimi ənənəvi ekran qoruyucularına üstünlük verilə biləcəyini bildirir.
