Huawei şirkətindən ayrılaraq öz yoluna davam edən Honor şirkəti bu gün yeni nəsil Honor 80 seriyası smartfonlarını Çində təqdim edib. Təqdimat zamanı Honor 80 seriyasına aid 3 smartfon modeli əlavə olunub. Belə ki, söhbət Honor 80, Honor 80 Pro və Honor 80 SE modellərindən gedir. Xatırladaq ki, daha öncə Honor 80 seriyasına aid yeni Honor 80 və Honor 80 Pro smartfonlarının 160MP kamera sensoru ilə təchiz edildiyini, həmçinin kameranın “8” rəqəminə bənzər dizayna malik olacağını bildirmişdik. Bu gün isə təqdimat zamanı bu iddia öz təsdiqini tapdı. Digər bir tərəfdən Honor 80 modeli Qualcomm şirkətinin ötən gecə təqdim etdiyi Snapdragon 782G çipseti ilə təchiz olunub. Yeni smartfonları bu gündən etibarən Çində ön sifariş etmək mümkün olsa da, qlobal bazara gələn ay çıxarılması gözlənilir.
Honor 80 seriyası smartfonları bizə nə vəd edir?
Honor 80 və Honor 80 SE modellərinə 6.67 düymlük 120Hz tezlikli AMOLED ekran paneli quraşdırılıb. FHD+ təsvir ölçülü ekran paneli 1000 nit parlaqlığa və 444 ppi piksel sıxlığına sahibdir. Qeyd edək ki, Honor 80 smartfonu 90.7% ekran-gövdə nisbətinə sahib olduğu halda, Honor 80 SE smartfonunda bu nisbət 91.2% təşkil edir. Buna isə smartfonların fərqlənən gövdəsi təsir edib. Dizayna diqqətlə nəzər yetirsəniz görərsiniz ki, arxa tərəfdə kamera moduluna qədər dizayn dəyişikliyi mövcuddur.
Seriyanın ən güclü nümayəndəsi olan Honor 80 Pro modeli isə digər modellərdən fərqlənir. Çünki, ekranın kənar çərçivələri olduqca sərt qıvrımlara malikdir. Bu cihazdakı ekran da texniki cəhətdən yenə 6.67 düymlük 120Hz tezlikli AMOLED panelə sahibdir. Lakin təsvir ölçüsü 1.5K olub, daha keyfiyyətlidir. Ən diqqət çəkən tərəfi isə Xiaomi Civi 2 bənzəri kapsul tipli ikili selfi kamerasına malik olmasıdır.
Performans cəhətdən baxdıqda isə Honor 80 modeli öz gücünü Snapdragon 782G çipsetindən alır. Seriyanın digər modeli olan Honor 80 SE modeli isə Dimensity 900 çipseti ilə təchiz edilib. Ölkəmizə böyük bir ehtimalla standart Honor 80 gələcəyi üçün, Honor 70 ilə müqayisədə Snapdragon 782G ilə çox fərqlənməyəcək. Seriyanın ən güclü nümayəndəsi olan Honor 80 Pro modeli isə Snapdragon 8+ Gen 1 çipseti ilə təchiz edilib. Nəticədə bir seriya daxilində həm orta, həm orta-üst, həm flaqman smartfon yer alıb.
Smartfonlar kamera cəhətdən hansı xüsusiyyətlərə malikdir?
Qeyd edək ki, Honor 80 və Honor 80 Pro modelləri 1/1.56 düymlük 160MP təsvir ölçüsünə malik kamera sensoruna malik əsas kameraya sahibdir. Honor həmçinintəkmilləşdirilmiş AI RAW alqoritmləri ilə təchiz olunmuş yeni Image Engine texnologiyasını da bu cihazlarla təqdim edib. Honor 80 SE modelində isə 64MP təsvir ölçülü əsas kamera mövcuddur. Təəssüf ki, sensorların istehsalçısı barədə məlumat mövcud deyil. Lakin araşdırmamıza görə xüsusiləşdirilmiş ISOCELL HP3 200MP sensorunun, Honor üçün özəl 160MP modifikasiyasıdır.
Təqdim olunmuş Honor 80 Pro modeli isə Honor 80 modelindən fərqli olaraq 50MP ultra-geniş bucaqlı kamera ilə təchiz olunub. Honor 80 və Honor 80 SE modelləri 8MP ultra-geniş bucaqlı kamera alıblar. Həmçinin, hər 3 model 2MP makro ilə təchiz olunub. Qeyd edək ki, Honor 80 smartfonu selfi kamerası ilə 1080p keyfiyyətdə 30FPS video qeyd edə bildiyi halda, Honor 80 Pro modeli 4k keyfiyyətdə 30FPS video da qeyd edə bilir. Bunun səbəbi isə Honor 80 modelində 32 MP, Honor 80 Pro modelində isə 50 MP selfi kamerasının quraşdırılmasıdır. İki ədəd selfi kamerası isə sadəcə marketinq hiyləsidir desək, yalan olmaz. Şirkət ikinci bir kamera kimi 2MP dərinlik sensoru quraşdırıb.
Smartfonların yerdə qalan xüsusiyyətlər nələrdir?
Yeni Honor 80 seriyası daxilində olan hər 3 smartfon modeli 66 Vatt naqilli şarj dəstəkləyir. Həmçinin Honor 80 və Honor 80 Pro modelləri 4800 mAs həcmli, Honor 80 SE modeli isə 4600 mAs həcmli batareya ilə təchiz olunub. Brendin iddiasına görə Honor 80 SE modeli 15 dəqiqəlik şarj ilə 80% şarj toplaya bilir. Honor 80 və Honor 80 Pro modelləri isə 15 dəqiqəlik şarj ilə 50%-dək şarj toplaya bilir. Həmçinin qeyd edək ki, Honor 80 Pro digər modellərdən seriyanın digər modellərindən fərqli olaraq stereo səs ucaldanlara malikdir. Seriyanın hər 3 modeli barmaq izi sensoruna malikdir və NFC texnologiyası ilə Bluetooth 5.2 texnologiyasını dəstəkləyir.
Smartfonların qiyməti
Seriya daxilində ən ucuz Honor 80 SE modelidir ki, 335$ başlanğıc qiyməti ilə təklif edilir. Seriyanın ikinci yerdə olan Honor 80 modelinin başlanğıc qiyməti isə 377$ təşkil edir. Seriyanın ən üst nümayəndəsi olan Honor 80 Pro isə 490$ qiymət etiketi ilə əlçatandır. Bütün bu qiymətlər Çin bazarı üçün keçərlidir.
