Bir müddət əvvəl Huawei şirkəti ABŞ sanksiyalarına görə bir çox yenilik etməyə məcbur qalmışdı. Məhz bu yeniliklərdən biri də tamamilə şirkətin özünəməxsus olan HarmonyOS əməliyyat sistemi idi. Belə ki, çinli texnologiya nəhəngi bu əməliyyat sistemi Google şirkətinin Android əməliyyat sistemindən asılılığına son qoya bilmişdi. İndi isə məlum olub ki, HarmonyOS sistemi qlobal bazarda təqdim ediləcək smartfonlarda olmayacaq və bu smartfonlardan istifadə etmək istəyənlər ənənəvi qaydada EMUI interfeysi ilə davam edəcək.
Ümumiyyətlə çinli texnologiya nəhəngi artıq öz əməliyyat sistemini təkmilləşdirib. Hətta HarmonyOS artıq çində təqdim edilən smartfonlar üçün 4-cü dəfə yenilənib. Huawei şirkəti Android proqramlarından və APK dəstəyindən çox yaxında tamamilə qurtulacaq. Hazırda əməliyyat sistemində cüzi də olsa Android proqramlarından asılılıq mövcuddur. Lakin çinli texnologiya nəhəngi Android dəstəyini HarmonyOS sistemindən 2024-cü ildə tamamilə aradan qaldıra biləcək. Əslində indi də Huawei bu dəstəyi böyük ölçüdə sonlandırıb.
Bundan əlavə sentyabrın 25-də Huawei-nin payız məhsullarının təqdimat konfransında Yu Chengdong elan etmişdi ki, şirkət HarmonyOS üçün öz proqramlarını işə salacaq və HarmonyOS Next-in ilkin baxış versiyası 2024-cü ilin birinci rübündə tərtibatçılar üçün əlçatan olacaq. Görünən odur ki, gələn il iOS, Android və HarmonyOS olmaqla 3 nəhəng əməliyyat sistemi mübarizə aparacaq. Lakin yenə də HarmonyOS qlobal bazardakı istifadəçilər üçün əlçatan olmayacaq. Yəni qlobal bazarda istifadəçilər Android əsaslı EMUI interfeysindən istifadə etməli olacaq.
