Daha əvvəl Speedtest mənbəsi cari ilin 2-ci rübü üçün hesabat yayımlamışdı. Hətta bu hesabata görə Azərbaycan internet sürətinə görə dünya ölkələri arasında 59-cu sıraya qədər geriləmişdi. İndi isə mövzumuz internetlərin sürəti deyil, onların qiymətləridir. Belə ki, Picodi Türkiyə mənbəsi birdən çox statistikaya istinad edərək, il ərzində dünyadakı internet qiymətləri ilə bağlı müqayisə aparıb. Təbii ki, hazırlanan siyahıda Azərbaycan da yer alır. Ümumiyyətlə bu gün ölkələr üzrə internet sürətləri və internet qiymətləri tamamilə fərqlənir.
Dünyadakı internet qiymətləri ilə bağlı aparılan araşdırmaya nəzər saldıqda ilk olaraq abunəlik qiymətlərinə görə müqayisə aparıldığını görərik. Qeyd edək ki, 100 Mbps internet sürəti üzrə abunəlik qiymətlərinə görə hazırda ölkəmiz 39-cu sıradadır. Yəni Azərbaycan abunəlik qiymətlərinə görə dünyanın ən bahalı internetlərini təklif edən ölkələr sırasındadır. Siyahıda ilk sırada 75.1 avro ilə Norveç, daha sonra isə 58.8 avro ilə İslandiya və 58.4 avro ilə Avstraliya dayanır. Ölkəmiz isə 26.5 avro qiymət ilə 39-cu sırada qərarlaşıb. Onu da qeyd edək ki, qonşu ölkələrdə Gürcüstanda bu göstərici 35.3 avro, Türkiyədə 12.7 avro və nəhayət Rusiyada isə 5.3 avroya bərabərdir. Bununla da Rusiya ən ucuz abunəlik qiymətinə sahib ölkə olub.
Aparılan araşdırmanın digər bir kateqoriyası isə aylıq 20 avroya qədər dünyada hansı sürətdə internetlərin təklif edilməsidir. Bu kateqoriya üzrə isə Latviya 1.2 Gps ilə birinci, Argentina, Albaniya, Macarıstan, Türkiyə ,Tayland, Vietnam, Slovakiya, Rusiya, Honkong və Polşa kimi ölkələr isə 1 Gbps ilə ikinci yerdədir. Habelə Braziliya, Bolqarıstan, Çin, Kolumbiya, Çili 600 Mbps ilə 3-cü sıradadır. Ölkəmiz isə 40-cı yerdə 70 Mbps göstəriciyə sahib ola bilib. Gürcüstanda isəbu göstərici 50 Mbps olaraq müəyyən edilib.
