Bu ilin sonunda rəsmi olaraq satışa çıxarılması gözlənilən Google Pixel 8 Pro və Pixel 8 modelləri temperatur sensoru ilə təchiz edilə bilər. Qeyd edək ki, texnologiya nəhəngi ötən günlərdə 2 yeni Pixel modelini təqdim etmişdi. Lakin əvvəlki I/O tədbirlərindən fərqli olaraq bu dəfə gələcəkdə təqdim ediləcək modellər barədə məlumat yox idi. Lakin indi yeni Pixel 8 Pro modeli tamamilə fərqli xüsusiyyəti ilə canlı olaraq görüntülənib. Temperatur sensoru ilə təchiz edilmiş cihaz istifadəçilərin temperaturunu ölçə biləcək. Kuba Voytsexovski adlı YouTube kanalında smartfonun yeni xüsusiyyəti və canlı görüntüsü yayılıb. Smartfon 3 kamera sensoruna və daha böyük kamera moduluna sahibdir.
Maraqlısı budur ki, yeni Pixel 8 Pro modeli kamera sensorlarından əlavə olaraq temperatur sensoru ilə təchiz edilib. Bu sensor ilk dəfə canlı olaraq görüntülənib. Bir çox insayder bu sensorun LİDAR sensoru olacağını iddia edirdi. Lakin məlum olub ki, Google yeni smartfonuna temperatur sensoru quraşdırıb. Qısa YouTube videosunda bu sensorun infraqırmızı temperatur sensoru olduğunu açıq-aydın görmək mümkündür. COVID-19 dövründən artıq bizə məlum olan elektron temperaturlar ilə eyni iş prinsipinə sahib olan bu sensorlar bədən istiliyini tam dəqiqliklə ölçməyə imkan verəcək.
Videoda görünür ki, Pixel 8 Pro smartfonuna quraşdırılan temperatur sensoru dəri ilə təmas etmədən bədən temperaturunu ölçür. Hətta smartfon bütün prosesi sadəcə 5 saniyədə yerinə yetirir. Yeni temperatur sensoru sadəcə insanların deyil istənilən obyektin temperaturunu ölçməyə imkan verəcək. Qeyd edək ki, Google artıq yeni sensoru sınaqdan keçirir. Hətta videodakı şəxsin Google şirkətində işlədiyi ehtimal olunur. Qeyd edək ki, yeni sensorun sadəcə Pixel 8 Pro smartfonu üçün əlçatan olacağı gözlənilir. Tensor G3 çipseti ilə birlikdə işləyəcək yeni sensoru Pixel 8 smartfonunda olmayacaq.
