Yaxın tarixdə təqdim edilməsi gözlənilən flaqman Google Pixel 10 modelinin 3D render görüntüləri, eləcə də dizaynı ortaya çıxarılıb. Belə ki, Pixel 9 ilə demək olar ki, eyni dizayna sahib olduğu görülən Pixel 10, sələfindən fərqli olaraq iki əvəzinə üç arxa kameraya sahib olacaq. Gəlin görək Pixel 10 seriyası nə təklif edəcək?
Qeyd etdik ki, dizaynı məlum olan Google Pixel 10 sələfindən fərqli olaraq üçüncü kamera ilə təchiz ediləcək. Bununla belə, üçüncü kameranın periskop yoxsa adi telefoto kamera olduğu hələlik məlum deyil. Bildirilir ki, Pixel 10 sələfi ilə eyni 6,3 düymlük ekranla gələcək. Ölçüləri 152,8 x 72 x 8,6 mm olan cihaz, Pixel 9-dan 0,1 mm qalın olan korpusa sahib olacaq. O, həmçinin 3,4 mm-lik kamera çıxıntısı ilə təqdim edilə bilər.
Əlavə olaraq isə, seriyanın digər iki üzvü olan Pixel 10 Pro və Pro XL-nin əvvəlki modellərlə eyni dizayna sahib olacağı bildirilir. Hər iki Pro modelinin TSMC tərəfindən istehsal edilən Google-un Tensor G5 prosessoru ilə təchiz ediləcəyi gözlənilir. Daha təkmil istehsal prosesi ilə istehsal olunacaq prosessor daha yüksək performans və daha uzun batareya ömrü təqdim edəcək. Ümumiyyətlə isə Pixel 9 seriyası keçən ilin avqustunda təqdim olunduğundan, Pixel 10 seriyasının da oxşar vaxt çərçivəsində təqdim ediləcəyi gözlənilir.
