Bu ilin əvvəlində təqdim edilən Galaxy S24 seriyasının ən performanslı modeli Galaxy S24 Ultra indi şikayətlər ilə gündəmdədir. Belə ki, Galaxy S24 Ultra istifadəçiləri sosial şəbəkələrdə S-Pen qələmi ilə bağlı maraqlı şikayətlər ediblər. Flaqman cihazdan istifadə edənlər S-Pen-dən pis qoxu gəldiyini iddia edirlər. Ümumiyyətlə Samsung brendi uzun müddətdir ki, Galaxy Seriyasında S-Pen-dən istifadə edir. Məhz bu qələm artıq brendin özünəməxsus xüsusiyyətlərindən birinə çevrilmişdir.
Zaman-zaman Samsung brendinin bəzi orta səviyyəli smartfonları barədə bəzi istifadəçilər sosial şəbəkələrdə şikayətlər edirdi. Lakin bu dəfə brendin ən son flaqmanı Galaxy S24 Ultra modeli S-Pen qələmi ilə əsas şikayət mövzusuna çevrilib. İstifadəçilərin iddialarına görə S-Pen-dən yanmış plastik qoxusu gəlir. Onlar bu qoxunun səbəbini bilmədiklərini iddia edərək və bunun normal olub-olmadığını da cənubi koreyalı texnologiya nəhənginin sosial şəbəkələrdəki hesablarından soruşmağa çalışırlar.
Samsung Community forumunun moderatoru nəhayət hadisəyə aydınlıq gətirdi. Belə ki, moderatorun sözlərinə görə, S-Pen saxlanc yeri, smartfondan istifadə zamanı istilik yaradan komponentlərin yaxınlığında yerləşdiyi üçün qələmdə olan plastik bəzən isinə bilir. Məhz bu qələmin isinməsi və bəzən yanmış plastik qoxusu verməsi də bundan qaynaqlıdır. Moderator onu da qeyd edib ki, yayılan bu qoxu qeyri-adi olsa da, zərərli deyil. Habelə, o bunun çox normal hal olduğunu və cihazın soyuduqda bu halın ortadan qalxdığını da bildirib. Əslində isə bu problem Galaxy S22 Ultra-dan bəri mövcuddur, S24 Ultra-a xas deyil.
