Samsung brendinin yeni flaqman modeli olan Galaxy S24 barədə yeni detallar ortaya çıxıb. Belə ki, Samsung Galaxy S24 modelinin dizaynı məşhur analitik tərəfindən sızdırılıb. Beləliklə gələn ilin ən çox gözlənilən smartfonu artıq bizlərə məlum olub. Əslində daha əvvəl də yeni smartfon barədə maraqlı detallar ortaya çıxmışdı. Bunlardan biri texnologiya nəhənginin S24 Ultra modeini 2TB yaddaş ilə təklif edəcəyi idi. İndi isə flaqman smartfonun necə görünəcəyi məlumdur.
OneLeaks mənbəsi tərəfindən sızdırılan Samsung Galaxy S24 modelinin dizaynı əslində elə də təəccüblü deyil. Lakin smartfonun təqdimat tarixinin daha yaxın tarixlərdə keçiriləcəyi barədə yeni məlumatlar ortaya çıxıb. Görünən odur ki, Samsung yeni S24, S24+ və S24 Ultra modellərini təqdim etmək üçün səbirsizlənir. Dizayn tərəfi bizlərə təəccüblü olmasa da, bəzi dəyişikliklərin şahidi ola bilərik. Bunlardan biri də smartfonun arxa tərəfindəki LED flaşın yerləşdiyi yerdir. Belə ki, bu LED flaş sələfində olduğu kimi, əsas kameranın yanında deyil, əsas və köməkçi kameraların arasında yerləşdiriləcək. O cümlədən indi kameralar daha estetik görünüşə malik olub.
Ön tərəfdə isə smartfonun kamera çəntiyi daha da kiçilib. Onu da qeyd edək ki, Galaxy S24 modellərində 2500 nit parlaqlığa malik OLED ekranların istifadə olunacağı gözlənilir. Həmçinin bir çox müasir funksiyalara sahib olan smartfon təcili yardım üçün peyk bağlantısı da dəstəkləyə bilər. Qeyd edək ki, bu funksiya hazırda flaqman iPhone modellərində istifadə olunur. Hələlik smartfonun nə zaman təqdim ediləcəyi və digər xüsusiyyətləri barədə məlumat yoxdur. Galaxy S24 Ultra modeli isə sələfinin dizaynında çox cüzi yeniləmələrlə təkrar qarşımızda olacaq.
