Ötən günlərdə iPhone 12 modellərində qeydə alınan SAR insidenti artıq aradan qalxır. Belə ki, iPhone 12 modellərindəki SAR dəyərlərinin normaldan daha yüksək olduğu müəyyən olunan Fransada artıq iPhone 12 qadağası qaldırıldı. Buna səbəb isə Apple şirkətinin təqdim etdiyi yenilənmə oldu. Apple iOS yenilənməsi ilə dünyanın diqqətini cəlb edən bu problemə son qoydu. Əslində daha əvvəl də Apple şirkəti problemin yenilənmə ilə aradan qaldırılıcağına söz vermişdi. İndi isə Apple səhvini düzəldə bilib.
Xatırladaq ki, iPhone 12 SAR limitini keçdiyi üçün Fransada qadağan edilmişdi. Hətta ölkənin radiotezliklər üzrə tənzimləyici orqanı modelin satışdan çıxarılması və hazırda satılan iPhone 12 modellərinin sazlanması üçün şirkətə rəsmi bildiriş göndərmişdi. Bundan əlavə Fransa texnologiya nəhənginə sadəcə 15 gün vaxt vermişdi. Məhz ötən gün yəni 15-ci gündə Apple problemi aradan qaldıra bilib. Əgər apple yenilənməni vaxtından təqdim edə bilməsəydi, Fransa o cümlədən digər Avropa ölkələri iPhone 12 ilə bağlı ciddi tədbirlər görəcəkdi.
Ümumiyyətlə Smartfon istifadəçilərini mümkün qədər təhlükəsiz istifadə ilə təmin etmək üçün SAR (Specific Absorption Rate) standartı yaradılmışdır. Bu elektromaqnit enerjisinin tipik udma əmsalıdır. Hər bir smartfon modelinin fərqli SAR (Specific Absorption Rate) səviyyəsi var. SAR göstəricisi nə qədər yüksək olarsa, cihaz bir o qədər təhlükəli hesab olunur. Almaniyanın Radiasiyadan Mühafizə İdarəsi tərəfindən verilən məlumata əsasən, SAR göstəricisi 1 kg üçün 2 Vt-dan çox olmamalıdır. Əgər göstərici çoxdursa, o zaman cihaz təhlükəli hesab olunur. Əksər modellrin SAR səviyyəsi 1,50 Vt/kg keçmir. Avropa ittifaqının standartlarına görə 2,00 Vt qədər SAR dəyəri təhlükəsiz hesab olunur.
