Son dövrlərdə texnologiya dünyasının əsas gündəm mövzusu Samsung brendinin yeni Galaxy S24 seriyasıdır. Belə ki, cənubi koreyalı texnologiya nəhənginin yeni flaqman smartfonu hələ təqdim edilməmiş bütün diqqətləri cəlb etməyi bacarıb. Analitiklər bu smartfonlar barədə məlumatları ortaya çıxarmağa davam edir. İndi isə Galaxy S24 seriyasında istifadə ediləcək çipsetlər, Exynos 2400 və Snapdragon 8 Gen 3 Geekbench platformasında sınaqdan keçirilib.
Gələn ilin əvvəlində təqdim ediləcək yeni Samsung Galaxy S24 seriyasının 2 fərqli çipset ilə təchiz ediləcəyi artıq məlumdur. Belə ki, Galaxy S24 və Galaxy S24 Plus modelləri, bir çox avropa ölkəsində Exynos 2400 çipseti ilə təklif olunacaq. Bununla belə, Samsung snapdragon 8 Gen 3 ilə təchiz edilmiş çipsetlərini də fərqli regionlarda istfiadəçilərinə təklif edəcək. Flaqman Galaxy S24 Ultra modeli isə bütün bazarlarda sadəcə Snapdragon 8 gen 3 ilə təklif olunacaq. Qeyd edək ki, Exynos 2400 çipseti ilə təchiz edilmiş Galaxy S24 Plus modeli Geekbench platformasında 2067 və 6520 xal toplayıb.
Snapdragon 8 Gen 3 prosessorlu Galaxy S24 Ultra-nın yeni Geekbench nəticəsi isə tək və çoxnüvəli olmaqla 2234 və 6807 xal olub. Onu da qeyd edək ki, bu nəticələr istehsal versiyasında daha fərqli ola bilər. Çünki hazırda sadəcə sınaq modelləri test mərhələsindən keçirilir. Bununla belə, təxmini hesablamaya əsasən, Snapdragon 8 Gen 3 çipsetli Galaxy S24 Ultra, Galaxy S23 Ultra ilə müqayisədə 34 faiz daha sürətli görünür. Ümumiyyətlə Galaxy S24 seriyasında istifadə ediləcək çipsetlər arasında elə də ciddi fərq görünmür.
