Samsung şirkətinin məşhur flaqman xətti olan Galaxy S seriyası sadəcə 1 ay uzaqdadır. 1 fevral tarixində təqdim edilməsi gözlənilən cihazlar Galaxy Unpacked tədbirinin timsalında bazara açılacaqlar. Həmişə olduğu kimi, bu il də təqdimata 3-4 ay qalmış smartfonların dizaynına dair detallar məlum olmuşdu. Avqust ayından bu yana qeyd etdiyimiz kimi, Galaxy S23 seriyası dizayn cəhətdən Galaxy S22 seriyasından demək olar çox cüzi fərqlənəcək. Ardından indi də təqdimata sadəcə 1 ay qalmış cihazlarla əlaqədar rəsmi təqdimat posterləri ortaya çıxıb.
Galaxy S23 seriyasının təqdimat görüntüləri ilə birlikdə bəzi texniki xüsusiyyətləri də dəqiqləşib
İlk növbədə sevindirici bir haldır ki, Galaxy S23 seriyasında Exynos 2300 çipsetinin olduğuna dair heç bir fakt mövcud deyil. Yəni Galaxy S23 seriyası Snapdragon 8 Gen 2 çipseti ilə bazara çıxarılacaq. Üstəlik bunu qüvvətləndirən digər bir faktor da Galaxy S22 FE modelinin bir anda ortaya çıxmasıdır. Ötən gün sızdırılmış detallara görə Galaxy S22 FE modeli Galaxy A74 modelini eyni qiymət səviyyəsində əvəzləyəcək və Exynos 2300 çipsetindən güc alacaq. Nəticə etibarilə Exynos 2300 çipseti orta-üst seqmentdə Galaxy S22 FE ilə qarşımıza çıxacaq. Təqdimat görüntüləri sızdırılan Galaxy S23 seriyasına gəldikdə isə görünüş cəhətdən biraz dəyişikliklər edilmiş Galaxy S22 seriyasına bənzər modellər müşahidə edilir.
Görünüş cəhətdən əsas diqqət çəkən dəyişiklik Galaxy S23 və Galaxy S23+ modelindədir. Çünki, smartfonların gövdəsi daha yuvarlaq kənarlara və uclara malik olacaq. Galaxy S23 Ultra modelində isə millimetrik səviyyədə bəzi detallar yenilənəcək. Digər bir dəyişdirilmiş dizayn elementi də çıxıntılı kamera obyektivlərinin kənarında parlaq metal görünüşlü halqaların olmasıdır. Fikrimizcə Galaxy S22 seriyasından Galaxy S23 seriyasını fərqləndirmək üçün əlavə edilən bu detal, o qədər də məntiqli alınmayıb. Xüsusilə uzun müddətli istifadə zamanı parlaq metal tipli elementlərin tez korlandığı məlumdur.
Qeyd edək ki, Galaxy S23 seriyasının batareya və şarj dəyərləri də rəsmi təqdimat posterindən ayrı sızdırılıb. Galaxy S23 Ultra modeli 5000 mAs həcmli və Galaxy S23+ modeli 4700 mAs həcmli olmaqla, hər ikisi 45 vatt sürətli şarj dəstəkləyən batareya alıblar. Galaxy S23 modeli isə 3900 mAs həcmli 25 vatlıq batareya ilə təchiz ediləcək.
