Samsung brendi yeni Galaxy A55 5G modelini hələ təqdim etməmiş olsa da, internetdə yeni modelin icmal videosu, canlı görüntüləri ortaya çıxıb. Görünən odur ki, Galaxy A55 5G modeli təqdimatdan əvvəl bizlərə tamamilə məlum olub. Ümumiyyətlə bu smartfon barədə daha əvvəl də internetdə məlumatlar sızdırılmışdı. Bu dəfə isə onun dizaynı və xüsusiyyətləri canlı olaraq nəzərdən keçirilib. Qeyd edək ki, smartfonun təqdimat tarixi hələ açıqlanmasa da, A seriyasının yeni üzvü gələn həftə Avropada satışa çıxa bilər.
İlk olaraq qeyd edək ki, yeni Galaxy A55 5G modeli canlı görüntüləri onun parlaq şüşə arxa paneli ilə bizə tanış olan Samsung dizaynına sahibdir. Bundan əlavə smartfon 6.64 düymlük, 120 Hz yeniləmə tezliyinə malik AMOLED displeyə malikdir. Bu ekran həmçinin Vision Booster və HDR 10+ dəstəyi təklif edir. Telefonda güc və səs düymələrinin yerləşdiyi sağ tərəfdə çıxıntı olan Samsung Key Island dizaynı mövcuddur. O cümlədən smartfon öz gücünü Exynos 1480 çipsetindən alır. Hansı ki, bu çipsetə RDNA 2 arxitekturasından istifadə edən Samsung-un Xclipse 530 GPU-su daxildir. İcmal videosunda smartfon Geekbench testində 1161 tək nüvəli və 3398 çoxnüvəli xal alır. AnTuTu testində isə 713,993 bal toplayır.
Kamera tərəfində isə smartfon 32MP ön kamera, 50MP əsas, 12MP ultra geniş bucaqlı və 5MP makro sensorlara sahibdir. Android 14 One UI 6.1 proqram təminatı ilə işləyən smartfon 12-256GB yaddaş seçiminə də sahibdir. Həmçinin Galaxy A55 5G modeli 25Vt şarj sürətinə sahib 5000 mAs batareya həcminə sahibdir. Cənubi Koreyalı texnologiya nəhəngi isə hələ də smartfonu rəsmi olaraq nə zaman təqdim edəcəyini açıqlamaq niyyətində deyil.
