OnLeaks ləqəbli insayder tərəfindən 91mobiles əməkdaşlığında Samsung Galaxy A54 seriyasına aid ilkin render görüntüləri sızdırılıb. Beləliklə, yaxınlaşmaqda olan Galaxy A54 seriyası barədə bəzi yeni detallar məlum olub. Hansı ki, smartfonun dizayn elementləri və o cümlədən bəzi texniki xüsusiyyətləri qarşımıza çıxıb. İlk olaraq elə render görüntülərini gördüyünüz smartfonun dizaynından bəhs etməyə başlasaq, Galaxy S seriyasına sadiq dizaynı özündə birləşdirəcək. Hansı ki, arxa tərəfdə qalın çıxıntı yaradan kamera modulu sadəcə obyektivlərdən kənara doğru ayrı-ayrılıqda uzanacaq. Eyni zamanda dördüncü kamera olan 5MP dərinlik sensoru da ləğv edilib. Əvəzinə əsas kameranın təkmilləşdirilərək 50MP ISOCELL GN3 ilə əvəzlənəcəyi ehtimal düşünülür.
Təbii ki, tək tək dizayn dəyişikliyi bununla bitmir. Smartfon gövdəsi də nisbətən daha dairəvi görünüşlü kənarlara sahibdir. Ekrana gəldikdə isə kənar çərçivələrin sanki qalınlaşdığı müşahidə edilir. Galaxy A54 modelinə aid ilkin render görüntüləri olduğunu və yekun cihaza baxmadığımızı nəzərə alsaq, yanıla da bilərik. Buna baxmayaraq verilən məlumata görə smartfonun ölçülərinin ~1 mm qısalıb, ~2 mm enləndiyini düşünsək və ekranın da 6.4 düymə kiçildiyini hesaba qatsaq kənar çərçivələrinin nisbətən böyük olacağından əmin olmaq olar. Smartfonun qeyd edilən texniki xüsusiyyətlərinə isə çox da toxunmayacağıq. Çünki, verilən texniki məlumatların doğruluq payı naməlumdur.
Sadəcə qeyd edə bilərik ki, smartfon standart olaraq 120Hz tezlikli AMOLED ekran panelinə, böyük bir ehtimalla 50MP ISOCELL GN3 kamera sensoruna və o cümlədən Exynos 1380 çipsetinə sahib olacaq. Bu yaxınlarda Exynos 1330 və Exynos 1380 çipsetləri dəqiqləşdirildiyindən, Exynos 1380 elə Exynos 1280 çipsetinin davamı kimi Galaxy A54 modelində işlədilə bilər. Exynos 2300 şərti adlı çipseti isə son məlumatlara görə ən azından Galaxy A74 və üzəri cihazlarda gözlənilməlidir. Yeni nəsil Galaxy A seriyasının təqdimatına gəldikdə, qarşıdakı 3 ay ərzində təqdim olunması planlaşdırılır.
