Smartfon bazarının iki əzəli rəqibi olan Samsung və Apple arasında yarış səngimədən davam edərkən, bu dəfə Cənubi Koreyanın texnologiya nəhəngi Samsung önə keçməyi bacarıb. Belə ki, ötən günlərdə 2024-cü ilin ikinci rübündə ən çox satış həyata keçirən smartfon brendləri açıqlanıb. Ümumiyyətlə, araşdırma onu göstərir ki, bu ilin ikinci rübündə illik müqayisədə satışlar 12% artaraq 288,9 milyon ədədə çatıb. Canalys bazar araşdırması firmasının fikrincə, sənaye innovativ məhsulların bazara çıxarılması və iqtisadi şəraitin yaxşılaşması sayəsində canlanma yaşayır.
Samsung bazar liderliyini möhkəmləndirib və 18% bazar payı ilə 53,5 milyon ədəd smartfon tədarük edib. Şirkətin yüksək seqmenli cihazları gəlir artımında mühüm rol oynayıb. Apple şirkəti isə Şimali Amerika və Asiya-Sakit Okean regionlarında 45.6 milyon ədəd tədarük edərək ikinci yerdə qərarlaşıb. Xiaomi, 42,3 milyon ədəd tədarüklə üçüncü yeri tutub və sürətli şəkildə bu rəqəm artmağa doğru gedir. Maraqlısı budur ki, Çinli texnologiya nəhəngi artıq Apple şirkətinə çox yaxındır. Bundan əlavə, Çin texnologiya nəhəngi Hindistanda 18% bazar payı ilə smartfon bazarında yenidən birinci yerə çıxıb.
Bazar ümumilikdə yüksəliş sürəti qazansa da, bəzi problemlər də ortaya çıxmağa başlayıb. Smartfonların bəzi hissələrinin çatışmazlığı, xüsusilə böyük ekranlar və qabaqcıl kameralar kimi yüksək seqmentli xüsusiyyətlər üçün istehsal xərclərinə təsir göstərir. Bu, kütləvi bazarı hədəfləyən brendlərə təzyiq göstərə bilər. Lakin, bütün bu problemlərə baxmayaraq Samsung ən çox satış edən smartfon brendləri siyahısında lider olmağı bacarıb.
