Gün keçdikcə müasirləşən həyatımızda naqilsiz qulaqlıqlar mühüm yerə sahibdir. Məhz bu səbəbdən də texnologiya şirkətləri hər il yeni funksiyalara və təkmilləşdirmələrə sahib qulaqlıq modellərini təqdim edirlər. Belə ki, bu şirkətlərdən bir olan Dyson, dünyada ilk dəfə hava təmizləmə funksiyasına sahib qulaqlıq olan Dyson Zone modelini hazırlayır. Qeyd edək ki, ilk dəfə 2004-cü ildə Bluetooth texnologiyası stereo səs sistemlərinə tətbiq olunmuşdu. Lakin ilk naqilsiz qulaqlıq modeli olan Dash, 2014-cü ildə qarşımıza çıxmışdı. Bu modeldən sonra isə dünyanın bir çox nəhəng texnologiya şirkəti yeni naqilsiz qulaqlıq modellərini təqdim etmişdi.
Dyson Zone naqilsiz qulaqlığı hansı xüsusiyyətlərə sahib olacaq?
Yeni Zone naqilsiz qulaqlığının ən önəmli və cəlbedici xüsusiyyəti hava təmizləyə bilməsidir. Yeni naqilsiz qulaqlıq elektrostatik filterlər ilə təchiz olunduğu üçün 99% təmizlənmiş hava istehsal edə bilir. Elektrostatik filterləri isə 12 ay istifadə etmək mümkündür. Həmçinin yeni naqilsiz qulaqlıq, ANC və ya səs-küy azaltmaq funksiyası ilə də təchiz olunub. Belə ki, bu funksiya ilə ətrafdakı səs-küyü 38 db-ə qədər azalır. Bundan əlavə isə qulaqlıq ətrafdakı səsləri saniyədə 384 min dəfə skan edir.
Əlavə olaraq qeyd edək ki. yeni naqilsiz qulaqlıq 2 rəng seçimi ilə təklif olunacaq. Bu rənglərə isə Ultra Blue/Prussian Blue və Prussian Blue/Bright Copper aiddir. 40 mm neodimium drayverə sahib olan qulaqlıq, çox keyfiyyətli səs sisteminə sahibdir.
Batareya tərəfində isə qulaqlıq, 2600 mAs batareya tutmu ilə 50 saata qədər istifadə müddəti təklif edir. Hava təmizləmə funksiyasından istifadə edərkən isə bu göstərici sadəcə 2,5 saata düşür. Gələn ay ABŞ-da satışa çıxarılması gözlənilən Dyson Zone, 945 dollar başlanğıc qiymətinə sahib olacaq.
