Hazırda SSD texnologiyası milyonlar insan tərəfindən istifadə olunur. Lakin bəzən SSD-lər arasında da müxtəlifliklər olur. Belə ki, onlardan bəziləri daha sürətli olduğuna görə, bəziləri daha tabil işlədiyinə görə bəziləri isə çox kiçik olmasına görə seçilir. Məhz bu dəfə Buffalo şirkəti tərəfindən dünyanın ən kiçik 1TB həcmli SSD qurğusu təqdim edilib. Qeyd edək ki, yeni SSD Yaponiyada satışa çıxarılır. Maraqlısı budur ki, bu SSD kompüterinizə sadəcə USB bağlantısı ilə qoşulur. Yəni naqilsiz mouse-larda olduğu kimi bu SSD qurğusunu kompüterinizə qoşa bilərsiniz.
Çəkisi sadəcə 5 qram olan dünyanın ən kiçik 1TB həcmli SSD qurğusu kiçik flash disklərə bənzəyir. Buffalo bütün diqqətləri öz üzərinə çəkən bu qurğuya SSD-PST1.0U3-BA adını verib. Bu SSD-nin ölçüləri isə 14,6 x 28 x 8 mm-dir. USB-A 3.1 portuna sahib olan bu SSD həm də 500GB və 250GB yaddaş seçimləri ilə təklif olunur. Lakin təəssüf ki, yaponiyada noyabr ayında 125 dollar qiymət ilə satışa çıxacaq bu SSD-ni digər ölkələrdə əldə etmək mümkün olmayacaq. Buffalo tərəfindən aparılan CrystalDiskMark testlərinə görə, kiçik SSD 600MB/san oxuma və 500MB/san yazma sürətinə malikdir.
Görünən odur ki, bu SSD-nin ən əhəmiyyətli xüsusiyyəti sadəcə ölçüsü və çəkisidir. Çünki onun sürəti hazırda bazarda olan bir çox SSD-dən geri qalır. Lakin yenə də ən sürətli xarici sabit disklərdən daha sürətlidir. Qeyd edək ki, hazırda SSD qurğuları 3150 MB/san-dən çox oxuma, 2700 MB/san-dən çox yazma sürətlərinə malikdir. O cümlədən, bu gün ala biləcəyiniz ən kiçik SSD, Kingston XS2000, CDM testində 1062MB/s oxuma və 999MB/s yazma sürətinə nail olub. Əksinə, bu SSD Buffalo SSD-PST1.0U3-BA SSD-dən təxminən beş dəfə ağırdır və ölçüləri 13 x 32 x 67 mm-dir.
