Günümüzdə texnologiya nəhəngləri müxtəlif xüsusiyyətlərə sahib olan monitorlar hazırlayaraq bazara çıxarır. İndi DELL şirkəti göz rahatlığına diqqət yetirən 40 düymlük 5K təsvir ölçülü əyri monitor hazırlayaraq bizlərə təqdim edib. CES 2024 sərgisinə günlər qala DELL 5 ulduzlu göz konforu iddiası ilə yeni monitorunu təqdim etmək qərarına gəlib. Qeyd edək ki, UltraSharp 40 Curved Thunderbolt Hub adlı yeni monitor fevral ayından etibarən satışa çıxarılacaq.
Ümumiyyətlə CES 2024 texnologiya dünyasında ən nüfuzlu və ən önəmli sərgilərdən biri hesab olunur. Texnologiya nəhəngləri ən iddialı flaqman məhsulları ilə bu sərgidə iştirak edir. Bir çox texnologiya nəhəngi yeni məhsullarını məhz sərgi günü gün işığına çıxararkən, bəziləri də sərgidən əvvəl diqqətləri öz üzərinə cəlb edir. Məhz DELL şirkəti də göz konforu ilə diqqət çəkməyə çalışdığı yeni 40 düymlük 5K monitor ilə sərgidə çıxış edəcək. Göz konforuna diqqət yetirən monitor dedikdə, burada göz yorğunluğunu azaltmağa kömək edən bir çox xüsusiyyətin olduğu başa düşülür. Belə ki, bunlardan birincisi daha axıcı görüntü üçün ekran yenilənmə sürətinin 120Hz-ə malik olmasıdır.
Digər önəmli xüsusiyyətlərdən biri isə məhz ekran parlaqlığını və rəng temperaturunu tənzimləməyə imkan verən sensorun monitora əlavə edilməsidir. DELL şirkətinin iddiasına görə məhz bu sensor göz yorğunluğun 17%-ə qədər azaldır. Nəhayət son olaraq da DELL mavi işıqların təsirini azaltmaq üçün yeni monitorda təkmilləşdirilmiş ComfortView Plus texnologiyasından istifadə edib. Qeyd edək ki, yeni UltraSharp 40 Curved Thunderbolt Hub monitoru 99% DCI-P3 / Display P3 rəng sahəsinə və 1,07 milyard rəngə sahibdir. O cümlədən monitor VESA DisplayHDR 500 sertifikatına, 2000:1 kontrast nisbətinə sahibdir. 27 fevral tarixindən monitor ABŞ-da 2400 dollar, Kanada-da isə 3290 dollar başlanğıc qiyməti ilə satışa çıxarılacaq.
